Kien għall-ħabta tal-5.30am meta l-Pulizija ġew informati li kien seħħ inċident tat-traffiku fi Triq it-Torri Tas-Sliema.
Mill-ewwel investigazzjonijiet jirriżulta li sewwieq ta’ karozza li għandu 36 sena residenti Tas-Sliema tilef il-kontroll, qasam il-linja u baqa’ dieħel f’karozza tal-Linja.
Fuq l-istess karozza tal-Linja li kienet misjuqa minn raġel ta’ 25 sena residenti Birżebbuġa kien hemm passiġġier ta’ 56 sena minn Tas-Sliema li sofra xi ġrieħi.
Fuq il-post mar tim mediku b’ambulanza li ħadu lis-sewwieq tal-karozza l-Isptar u anke lill-passiġġier. Filwaqt li s-sewwieq tal-karozza ġie ċċertifikat li sofra ġrieħi ħfief, il-kundizzjoni tal-passiġġier s’issa għadha mhix magħrufa.
Il-Pulizija qegħdin jinvestigaw dan il-każ.