Minn Cristian Muscat
Kif bdiet l-imħabba tiegħek lejn il-futbol?
Minn ċkunitni, il-logħba tal-futbol dejjem ħabbejtha. Minħabba diversi sitwazzjonijiet meta kont żgħir, ma kontx involut direttament fil-logħba, iżda hekk kif bdejt nikber dejjem kelli interess fit-tim ta’ nies li jkunu hemm biex dawk l-11-il plejer ikunu ppreparati għal logħba wara oħra.
Beda jinteressani l-aspett ta’ kif kowċ jamministra tim ta’ individwi biex jaħdmu flimkien. ‘Il quddiem, bl-esperjenza tax-xogħol u tal-futbol flimkien, bdejt ninteressa ruħi fil-mod ta’ kif klabb jitmexxa, u hemmhekk bdejt nistudja diversi metodi ta’ kif klabbs jitmexxew u l-isfidi differenti li dawn jiffaċċjaw, speċjalment fil-kuntest ta’ Malta, fejn ammont kbir ta’ nies involuti jagħmlu dan b’volontarjat.
Iddeskrivi r-rwol tiegħek bħala Viċi President ta’ Fgura United FC.
Ir-rwol tiegħi bħala Viċi President huwa l-aktar iffukat fuq il-bżonnijiet tan-Nursery. F’dawn l-aħħar snin in-Nursery tagħna kibret ħafna, u dan wassal għal ħafna xogħol amministrattiv. Ir-rwol tiegħi hu li nieħu ħsieb, flimkien mat-tim tekniku tan-Nursery u membri tal-kumitat, li nikkordinaw l-operat tan-Nursery.
Kemm taħdem spalla ma’ spalla mal-President tal-klabb, Larkin Bonnici?
Il-President Larkin Bonnici huwa pedina importanti ħafna fil-klabb. L-esperjenza u d-dedikazzjoni tiegħu huma ta’ ispirazzjoni għal ħafna minna, speċjalment għalina l-ġodda. Ħafna mid-deċiżjonijiet nidiskutuhom flimkien, u tista’ tgħid li nkunu f’kuntatt kuljum dwar il-kordinazzjoni tal-klabb.
X’tikkummenta dwar l-andament tat-tim matul dan l-istaġun s’issa?
L-iskwadra tal-kbar bħalissa tinsab ikkonċentrata u qed iġibu riżultati tajbin. Il-ħidma li saret b’għaqal fiż-żmien ta’ tfassil tat-tim u t-tim tekniku qed tagħti l-frott tagħha. Mit-timijiet l-oħra kompetittivi ta’ Fgura, għaddejjin minn xi sfidi minħabba li qed nikkompetu kontra l-ogħla livell, u dan jirrikjedi aktar ħin biex nistabbilixxu ruħna.
X’inhuma l-aspirazzjonijiet tagħkom għal dan l-istaġun, anke wara d-diversi akkwisti importanti li għamiltu fix-xhur tas-sajf li għadda?
Fit-tim tal-kbar, l-objettiv primarju hu li naslu mat-top 8, sabiex fit-tieni fażi tal-istaġun inkunu nistgħu nilagħbu kontra t-timijiet ewlenin, u għaliex le, nippruvaw nilħqu l-quċċata. Għat-timijiet l-oħra kompetittivi, l-għan hu li nistabbilixxu ruħna fl-ogħla livelli.
X’tikkummenta fuq il-livell tal-futbol Malti fil-preżent?
Jien bħalissa qed nagħmel teżi ta’ Masters u fil-fatt dan hu s-suġġett li qed nirriċerka dwaru, il-kwalità fil-futbol Malti min-naħa amministrattiva, b’fokus fuq in-Nurseries. Hemm ħafna ideat u metodoloġiji differenti, u kull Nursery timplimentahom b’mod differenti.
Hemm bżonn ta’ gwida ħolistika għall-klabbs dwar kif għandhom jitmexxew ċerti oqsma, kemm min-naħa amministrattiva kif ukoll teknika. Bħalissa hemm ħafna ideat, imma nuqqas ta’ konċentrazzjoni u nies speċjalizzati biex dawn jiġu implimentati.
U dwar ir-riżorsi (grawnds) fejn tħarrġu u tilagħbu l-logħob kompetittiv tagħkom?
Aħna, grazzi għall-ħidma tal-kumitat preċedenti u l-preżenti, dejjem ħabbejna naraw li l-grawnd primarju tagħna jkun ta’ livell xieraq biex nagħtu l-aħjar lill-plejers tagħna ta’ kull livell.
Naturalment, biex iżżomm numru kbir ta’ tfal jirrikjedi ħafna iktar grawnds. Bħalissa noperaw minn erba’ grawnds differenti biex nagħtu l-aħjar riżorsa lil kull kategorija, mill-iżgħar ta’ tliet snin sat-tim tal-kbar. Dan jirrikjedi ħafna aktar xogħol amministrattiv u spejjeż, peress li dawn il-grawnds iridu jinkrew.
Kif qed tħares lejn il-futur tiegħek fl-amministrazzjoni tal-futbol?
Jien nixtieq inkompli nagħti l-kontribut tiegħi primarjament lejn il-klabb ta’ Fgura billi nressaq l-ideat tiegħi dwar kif nistgħu nkomplu nikbru u ntejbu l-klabb.
Nixtieq ukoll li kemm bħala klabb, kif ukoll jien personalment, inkunu pedina importanti fejn tidħol il-bidla li hemm bżonn f’ċertu mentalità, biex nagħmlu l-pass li jmiss u nibdew naħsbu b’mentalità aktar professjonali, kemm fl-attitudni kif ukoll fit-tmexxija tal-entitajiet fil-futbol.
Għaddi messaġġ finali lil min jixtieq jagħmel karriera ta’ suċċess fil-futbol.
Nixtieq ngħid li kull min irid jagħti kontribut, kulħadd għandu post. Il-mod kif huma strutturati l-klabbs hawn Malta huwa differenti minn dawk professjonali barra minn hawn, fejn hemm investiment finanzjarju kbir.
Kemm mill-perspettiva tal-plejers kif ukoll ta’ dawk fl-amministrazzjoni, l-importanti hu li dejjem tagħti l-massimu tiegħek.
Ħafna drabi ngħidu li l-plejers barranin qed jieħdu post it-talent Malti, iżda d-differenza tkun li dak il-plejer li jkun telaq kollox biex jiġi Malta jkun iffukat 100%, filwaqt li xi plejers lokali jkunu ffukati fuq mitt ħaġa oħra u mhux dejjem jagħtu l-100%. Hemmhekk tibda tintilef il-kwalità.