Minn Cristian Muscat
Il-futbol Malti għandu storja twila ta’ plejers u kowċis li jħallu impatt, iżda ftit jistgħu jifhmu x’involvi l-lealtà u d-dedikazzjoni li joħloq kowċ bħal Kevin Vella. Fil-25 ta’ Jannar li għadda, Vella laħaq ument li kull kowċ jimmaġina iġifieri l-200 logħba tiegħu bħala Head Coach ta’ Fgura United FC. Dan mhux biss jirrifletti s-suċċess tiegħu fil-grawnd, iżda wkoll il-konsistenza u l-professjonalità li ġġib magħha l-karriera tiegħu.
Bħala kowċ, Vella dejjem enfasizza fuq l-importanza tal-kontinwità u l-viżjoni twila. “Dan hu tragward importanti ħafna għalija,” qalilna f’intervista li ħadnilu. “Mitejn logħba mal-istess klabb mhux ħaġa faċli fil-futbol. Ħajja ta’ kowċ hija qasira ħafna, u għalhekk kull sena u kull logħba għandhom valur enormi.” Minn meta beda jaħdem ma’ Fgura United tmien snin ilu, il-mira tiegħu kienet ċara: biex jibni klabb b’fondazzjoni soda, bi strateġija ċara u tim li jemmen fil-kontinwità u l-evoluzzjoni kostanti.
Meta jħares lura lejn din l-okkażjoni, Vella jenfasizza kemm il-proġett ta’ Fgura United irnexxa mija fil-mija. “Il-klabb immexxi kif suppost, nies professjonali, dedikati ħafna, ma jieħdux deċiżjonijiet ta’ malajr, u jemmnu fil-kontinwità. Flimkien ilħaqna viżjoni tagħna.
Bħala Fgura United konna tlajna Challenge League u stabilixxejna ruħna hemmhekk. Nista’ ngħid li proġett irnexxielna.” Il-wegħda li wettaq kienet mhux biss biex iżomm il-klabb fin-naħa ta’ fuq tal-klassifika, iżda wkoll biex iħalli marka fit-tul fil-futbol Malti.
Il-karriera ta’ Vella qabel Fgura United turi wkoll passjoni u esperjenza wiesgħa. B’kundizzjonijiet differenti u sfidi varji, hu mexxa diversi timijiet Malti. Minn Sirens FC, fejn għen lill-klabb jilħaq promozzjoni doppja mit-tielet sal-ewwel Diviżjoni bħala champion fl-istaġun 2013/14, sa Tarxien Rainbows u Mġarr United, Vella dejjem wera li għandu ħiliet ta’ strateġista u lider naturali. Din l-esperjenza wriet kemm hu versatili u kif jista’ jirnexxi f’ambjenti differenti, dejjem billi jħares lejn l-għan ewlieni: it-tisħiħ tat-tim u l-bini ta’ kulturá ta’ suċċess.
Matul il-karriera tiegħu ma’ Fgura United, Vella mhux biss iffoka fuq il-logħob innifsu, iżda wkoll fuq il-bini tal-persuni madwaru. Il-fatt li llum il-klabb qed jilħaq l-aqwa tmienja taċ-Challenge League għall-ewwel darba fl-istorja tiegħu hija xhieda tal-impenn u l-professjonalità tal-plejers u tal-istaff kollu. “Seba’ snin pożizzjoni tajba, ilħaqna objettivi tagħna kmieni ħafna fl-istaġun. Minn sena għall-oħra t-tim qed ikompli jissaħħaħ u jevolvi.
Bħala klabb issa rridu nagħmlu tarġa li jmiss, nitilgħu nilagħbu fil-Kampjonat Premier,” qal Vella, b’passjoni u ambizzjoni ċara li għadu ma temmiex.
Il-kowċ ma jnissilx is-suċċess tiegħu waħdu. Hu jagħti kreditu lill-kumitat, li minn meta laqqgħu l-ewwel darba f’2018 wera fiduċja fuqu, lill-istaff tekniku li jappoġġjah kuljum, lill-plejers li matul tmien snin wrew fiduċja u appoġġ, u l-partitarji li hemm dejjem warajhom it-tim, tajjeb u ħażin. “Grazzi lill-familja tiegħi li dejjem issapportjani u għalhekk rnexxieli nilħaq dan it-tragward,” żied jgħid. Din il-ħbiberija u s-suġġeriment personali jirriflettu kemm il-karattru tiegħu huwa importanti kemm barra kif ukoll fil-pitch.
Vella ma tantx iħobb ifittex il-glorja personali minħabba li l-mira tiegħu hija dejjem biex il-klabb jikber u jiftaħ triq ġdida. Il-fatt li rnexxielu jiggarantixxi kontinwità f’post fejn ħafna kowċis jitħallew wara ftit snin biss huwa sinjal ta’ fiduċja reċiproka bejnu u l-klabb. Il-proġett ta’ Fgura United ma kienx biss fuq riżultati immedjati, iżda dwar strateġija li tappoġġja l-progress sostenibbli.
Il-ħidma ta’ Vella u l-mument tal-200 logħba huma simbolu ċar li f’Malta tista’ tikseb konsistenza u suċċess jekk wieħed ikun dedikat u jagħti importanza lill-valuri ta’ tim u klabb. Hija storja ta’ lealtà, passjoni u viżjoni. Għal Vella, dan mhux l-aħħar, iżda biss il-bidu ta’ kapitlu ġdid. L-għan li jmiss hu issa li Fgura United jilħqu l-Premier League u b’hekk il-futbol Malti qed jara kowċ li mhux biss jifhem il-logħba imma li wkoll iħalli legat li jibqa’ jissemma’ fil-futur.
Barra mil-logħob u r-riżultati, Kevin Vella jemmen ferm fil-bini ta’ kultura pożittiva fi ħdan it-tim. Hu jgħid li kull plejer għandu rwol ċentrali u li r-rispett u l-komunikazzjoni mhumiex affarijiet sekondarji, iżda l-qalba tal-progress. Matul is-snin, hu enfasizza l-importanza li tim ta’ plejers iżid l-isforz individwali u kollettiv biex il-klabb jikber, mhux biss fil-klassifika iżda wkoll bħala familja waħda.
Din il-viżjoni tifforma l-bażi għall-iżvilupp sostenibbli, fejn il-futur jiġi mfassal fuq evoluzzjoni kontinwa tal-plejers, tal-istaff u tal-komunità li jsegwu Fgura United bil-passjoni kollha tagħhom.
Kevin Vella huwa eżempju ta’ kowċ li jħaddan il-professjonalità, id-dedikazzjoni u l-passjoni għal-logħba. It-tragward tiegħu ta’ 200 logħba ma’ Fgura United mhux biss jagħtih sodisfazzjon personali, iżda jagħti wkoll tama u ispirazzjoni għall-plejers, kowċis u partitarji kollha li jemmnu fil-potenzjal ta’ proġetti li jsiru b’viżjoni u kontinwità.