Il-Ġimgħa, fir-Royal Malta Golf Club, ingħataw id-dettalji dwar il-kompetizzjoni li se tkun qed issir il-Ħadd li ġej. Waqt konferenza tal-aħbarijiet, il-President tal-Malta Golf Association, William Beck, spjega kif nhar il-Ħadd 30 ta’ Ottubru, se tkun qed issir il-Junior Competition tal-Golf u li fiha ser jipparteċipaw 32 tifel u tifla li lkoll għandhom inqas minn 16-il sena.
Akkumpanjat miċ-Chairman ta’ PGA Malta, Henning Schulze-Doering u d-Direttur Eżekuttiv tal-MGA, responsabbli mill-Junior Academy, Doreen Balzan, Beck saħaq li l-Golf huwa wieħed mill-ftit sports li jista’ jintlagħab mill-familja kollha, fl-istess ħin. Dan filwaqt li fakkar kif dan l-isport, jintlagħab fl-isbaħ partijiet tad-dinja.
Matul id-diskors tiegħu, il-president tal-MGA saħaq li aktar persuni qed ikomplu iżidu l-apprezzament tagħhom lejn il-golf għaliex issa huwa approvat li jgħin kemm lis-saħħa fiżika u anke s-saħħa mentali.
William Beck irringrazzja lill-isponsors uffiċjali tal-Junior Competition, Ozo Group, fejn stqarr li huwa grazzi għal sponsorships ta’ dan it-tip, li l-isport jista’ jkompli jikber. Hu spjega kif Ozo Group mhux biex provdew fondi għal dan l-isport iżda wkoll 10,000 ballun tal-golf li qed jintużaw mill-akkademja tat-tfal waqt it-taħriġ. Il-President tal-MGA saħaq li l-Junior Competition hija prova ċara ta’ x’differenza pożittiva jagħmlu għajnuniet ta’ dan it-tip mis-settur privat.
Intant, minn naħa tiegħu, iċ-Chairman ta’ OZO Group, Mario Muscat, irringrazzja l-assoċċjazzjoni tal-golf taċ-ċans li ngħata biex jgħin finanzjarjament f’dan l-isport. Muscat saħaq li jemmen bis-sħiħ li l-edukazzjoni u l-isport, jista’ jgħin lit-tfal tagħna jżommu ‘l bogħod mill-vizzji u jibnu futur sabiħ.
“Fl-opinjoni tagħna, huwa importanti ħafna li kwalukwe assoċċjazzjoni tal-isport fil-pajjiż, mhux biss tiffoka fuq is-senior players u kompetizzjonijiet kbar, iżda jagħtu importanza mistħoqqa liż-żgħażagħ, biex b’hekk ikun assigurat futur sabiħ” saħaq Mario Muscat.
Matul id-diskors tiegħu, Mario Muscat faħħar l-inizjattiva tal-MGA li tintroduċi taħriġ tal-golf għal tfal minn 4 snin, permezz tan-nursery tagħha. Hu awgura lill-Golf Association l-aqwa suċċess għal din il-Junior Competition iżda fuq kollox awgura lill-parteċipanti kollha.