Kolumbjan ta’ 31 sena ġie arrestat wara investigazzjonijiet fuq suspett ta’ traffikar tad-droga.
Huwa ġie arrestat il-Ġimgħa, għall-ħabta tad-9.00p.m., f’Sa Maison.
Dan wara li investigazzjoni wasslet għal tfittxija fuq ir-raġel u nstab fil-pusses ta’ pilloli suspettati ecstasy, kif ukoll aktar minn €1,000 fi flus kontanti. Saret ukoll tfittxija fir-residenza fl-Imsida, fejn minbarra li nstabu aktar minn €2,000 oħra fi flus kontanti, il-Pulizija elevat sustanzi oħra suspettati kannabis, katamina, kokaina u MDMA, li l-valur ilaħħaq madwar €21,000.
Il-Kolumbjan se jitressaq il-Qorti akkużat b’allegat traffikar tad-droga, fil-ħin li ġej quddiem il-Maġistrat Dr Yana Micallef Stafrace LL.D.
