Riċentament l‑Arċisqof Charles Scicluna ħatar lir-Rev. Jesmond Schembri bħala Direttur tal‑Kummissjoni Migranti. Huwa qed jieħu post Dun Anton D’Amato li kien ilu jservi f’din il‑kariga għal kważi ħames snin. Rev. Jesmond Schembri kien studja t‑Teoloġija fil-Fakultà tat-Teoloġija fl-Università ta’ Malta, u kien ukoll gradwa fil‑Ħidma Soċjali mill‑Università ta’ Malta u dik ta’ Hull fir‑Renju Unit.
Rev. Jesmond Schembri għandu esperjenza estensiva fil-ħidma soċjali, partikolarment fil-qasam tad-dipendenzi, kien ukoll ikkontribwixxa għall-iżvilupp tal-politika soċjali u ħadem fil-protezzjoni tad-data. Huwa kien ingħaqad mal-Kummissjoni Migranti f’Ottubru 2023, u kien għal dawn l-aħħar xhur qed jassisti lil Dun Anton D’Amato, u li issa ħa l-kariga tiegħu uffiċjali bħala direttur.
Rev. Jesmond Schembri kien ġie ordnat djaknu tal-Knisja Griega-Kattolika f’Mejju 2023, u meta staqsejna eżatt xi jfisser dan l-irwol huwa jiddeskrivi dan l-irwol bħala “rwol li nassisti waqt il-liturġija, jiġifieri, biex tifhem l-irwol ta’ djaknu eżatt, djaknu mhuwiex qisu xi ħadd li huwa assistent tal-qassis, imma djaknu hu dak li fil-Liturġija Biżantina, flimkien mal-qassis jagħmel il-Liturġija, għax djaknu jmexxi 35% tal-Quddiesa, għandna l-Evanġelji, l-Omeliji, jiġifieri għandna parti importanti fir-rit Grieg għax il-Liturġija Biżantina hija kemxejn differenti.” Dan huwa għalhekk kemxejn differenti mir-Rit Kattoliku fejn ħafna mid-drabi naraw li qassis qed iqaddes waħdu l-Quddiesa kollha.
Rev. Jesmond Schembri matul din l-intervista spjegalna wkoll x’tinvolvi l-Liturġija Biżantina, li kif għedna hija differenti mir-Rit Kattoliku Ruman u li aħna forsi mhux imdorrijin daqshekk biha u m’aħniex daqshekk familjari. Huwa spjega li “aħna naqsmuha ma’ ħutna l-Ortodossi, jiena xorta Kattoliku, u aħna xorta qegħdin f’komonjuni sħiħa mal-Papa, u anke l-Isqof tiegħi huwa l-Isqof ta’ Malta.” Iżda spejga wkoll li huwa r-rit li huwa differnti u b’hekk id-djaknu għandu dan l-irwol u sehem attiv fil-Quddiesa.
Lura dwar il-Kummissjoni Migranti, li tagħha huwa issa Direttur, Rev. Jesmond Schembri spjega li ilha għal dawn l‑aħħar 75 sena tgħin lill‑emigranti Maltin u l‑familji tagħhom, kif ukoll lill‑immigranti li ġew f’Malta biex isibu kenn jew biex jaħdmu. Fost ħidmietha, il‑Kummissjoni toffri għajnuna lill‑immigranti biex jgħixu b’dinjità u tgħinhom fil‑proċess ta’ integrazzjoni fis‑soċjetà Maltija.
Iżda x’se jkun eżatt ir-rwol ta’ direttur fil-kummissjoni Migranti, kemm fil-Knisja u anke fis-soċjetà Maltija? Rev. Jesmond Schembri qalilna li “l-kariga tiegħi issa ilni nassisti lil Fr Anton sena u nofs, kważi sentejn, u l-irwol tiegħu huwa dak li nkompli mmexxi l-Kummissjoni Immigranti, dejjem skont il-viżjoni tal-Knisja, u l-viżjoni tal-Knisja hi, li kull bniedem huwa maħluq xbieha ta’ Alla, u għalhekk kull bniedem ħaqqu d-dinjità tiegħu, inkluż dawn il-persuni li jiġu fostna, kemm dawk li aħna nsejħu bħala ‘asylum seekers’, ikunu ġejjin minn xi sitwazzjoni politika jew ekonomika diffiċli ħafna, jew inkella dawk il-persuni li aħna nsejħu t-‘third country nationals’, dawk li jiġu f’Malta bil-permess biex jaħdmu fl-ekonomija tagħna eċċ. Sfortunatament dawn ukoll huma nies li jsibu tbatija u jkollhom bżonn min jgħinhom”. U għalhekk żgur li din il-Kummissjoni Immigranti qed toffri sapport kbir lil dawn in-nies biex isibu l-għajnuna hawnhekk f’Malta.
Tkellimna wkoll dwar l-istorja tal-Kummissjoni Immigranti, li skont Rev. Jesmond Schembri, kienet storja li “proprjament bdiet mal-emigranti, aktar milli mal-immigranti, jiġifieri kienet bdiet apposta biex tgħin lil dawk in-nies Maltin, qed nitkellmu fiż-żmien tal-ħamsinijiet u anke s-sittinijiet u xi ftit is-sebgħinijiet, li kienu qed jitilqu minn Malta u jmorru jfittxu futur f’pajjiżi oħra, u din il-Kummissjoni Immigranti, li kienet bdiet fi ħdan l-Azzjoni Kattolika, u l-ewwel missjoni tagħha kienet li tassisti lil dawn in-nies, kemm fil-qasam soċjali, u kif ukoll fil-qasam spiritwali eċċ, mhux biss lilhom, imma anke lill-familja tagħhom.” Dan għaliex il-litteriżmu dawk iż-żminijiet kien għoli ħafna u allura l-familji u l-qraba ta’ dawn l-emigranti kienu jmorru f’din il-kummissjoni biex jaqrawlhom l-ittri li jkunu ntbagħtu minn postijiet bħalma huma l-Awstralja u l-Kanada. Dan kien ikun ta’ sapport ukoll għal dawk li kienu baqgħu hawn Malta, u mhux biss għal dawk li kienu telqu.
Illum il-ġurnata, il-Kummissjoni Immigranti qed tgħin ħafna barranin li jkollhom “bżonnijiet legali, bżonnijiet soċjali, u wkoll bżonn ta’ residenza. Fil-fatt għandna dar Ħal Balzan li fiha nilqgħu madwar 45 persuna li huma wkoll immigrant li għandhom bżonn l-għajnuna fis-soċjetà tagħna.”
Iżda jekk forsi l-immigranti jsibu min jilqagħhom u jgħinhom daqstant ieħor jaf insibu wkoll l-idea li dawn ma jiġux milqugħa kif suppost, u meta tkellimna dwar dan ma’ Rev. Jesmond Schembri, huwa qalilna li “meta ssir taf persuna b’mod personali, il-preġudizzju jaqa’, jiġifieri altru jiena naf lil xi ħadd għax hu minn ċertu pajjiż, jew għax għandu kulur tal-ġilda partikolari, dawk li aħna nsejħu sterjotipi, u altru nkun naf persuna billi nsir naf x’jismu, l-istorja tiegħu, inkun naf kif iħossu, dawk l-isterjotipi jaqgħu. Għalhekk jiena naħseb li forsi għad ma hemmx biżżejjed laqgħat bejn il-Maltin u dawn il-persuni, u ma nifhmux li dawn il-ħafna barranin li qegħdin hawnhekk, almenu l-maġġoranza, huma hawnhekk biex isostnu l-ekonomija tagħna, jiġifieri fl-aħħar mill-aħħar, qegħdin hawn biex aħna jkollna ħajja aħjar, għalhekk hemm bżonn li dan il-preġudizzju, jekk hemm, jieqaf, u nkunu kapaċi nilqgħu u niltaqgħu ma’ dak li hu differenti aktar minna, u meta niskopru kemm dawn huma differenti minna niskopru wkoll wara kollox kemm aħna l-istess.”
Jekk wieħed irid jagħmel kuntatt mal-Kummissjoni Immigranti jew anke biex joffru l-għajnuna tiegħu, jista’ jmur personalment l-uffiċini li jinsabu bieb ma’ bieb mal-Barrakka ta’ Fuq fil-Belt Valletta, fejn hemm blokka ta’ binja li jisimha Dar l-Emigrant, u jkunu miftuħin mit-Tnejn sal-Ġimgħa bejn it-8.30pm u 12pm, jew inkella permezz tan-numru tat-telefon, 22039400, jew ukoll billi jidħol fis-sit migrants.mt u jkun jista’ jagħmel bookings li jkollu bżonn u anke permezz tal-email minn dan l-istess sit. Nawguraw lil Rev. Jesmond Schembri fil-ħidma tiegħu!
