Mal-200 politiku dinji kkundannaw il-liġi l-ġdida li ċ-Ċina qed tippjana dwar l-aspett tas-sigurtà nazzjonali f’Hong Kong.
Pajjiżi li jinkludu r-Renju Unit, l-Awstralja u l-Kanada wrew it-tħassib tagħhom li l-leġiżlazzjoni Ċiniża għas-sigurtà nazzjonali f’Hong Kong tista’ tnawwar is-sistema tat-tmexxija tat-territorju Ċiniż.
Il-politiċi f’Hong Kong li huma favur id-demokrazija kkritikaw bil-qawwa kollha l-abbozz ta’ liġi li ġiet ippreżentata nhar il-Ġimgħa li għadda fil-ftuħ tas-sessjoni leġiżlattiva Ċiniża. L-abbozz se jkun qed jipprojbixxi tentattivi biex Hong Kong tinfired miċ-Ċina, jew intervent ta’ pajjiżi barranin dwar dan.
Din il-mossa waslet wara xhur ikkaratterizzati minn dimostrazzjonijiet li sarrfu anke fi vjolenza bejn il-pulizija u d-dimostranti.
