Kylian Mbappe (ritratt), Vinicius Jr u Erling Haaland huma l-aktar players ta’ valur fid-dinja, skond il-grupp ta’ riċerka CIES Football Observatory.
Mbappe, 23 sena, li rrifjuta trasferiment ma’ Real Madrid biex jibqa’ f’Paris St-German, jinsab fil-quċċata tal-lista b’valur ta’ trasferiment stmat ta’ £175.7 miljuni.
Il-winger Brażiljan ta’ Real Madrid, Vinicius Jr, li skorja l-goal rebbieħ fil-finali taċ-Champions League kontra Liverpool, jinsab it-tieni għal £158.3 miljuni, bl-attakkant tan-Norveġja li se jingħaqad ma’ Manchester City, Haaland, it-tielet b’£130.4 miljuni.
Il-midfielder ta’ Borussia Dortmund, Jude Bellingham (£114.1m) huwa l-iktar player Ingliż siewi fil-lista fil-ħames post, quddiem sieħbu tat-team tal-Ingilterra u midfielder ta’ Manchester City, Phil Foden, fis-sitt post (£105.9m).
Il-clubs tal-Premier League jiddominaw il-lista b’41 rappreżentant fl-ewwel 100.
Is-CIES juża firxa varjabbli nklużi l-età tal-player, il-prestazzjonijiet, il-valur ekonomiku tal-club tiegħu u l-inflazzjoni biex jinħadmu l-valuri tat-trasferimenti stmati.
L-attakkant ta’ Franza, Mbappe, iffirma kuntatt ġdid ta’ tliet snin ma’ PSG ix-xahar li għadda hekk kif għażel li jibqa’ Pariġi milli jmur mar-rebbieħa ta’ La Liga u taċ-Champions League, Real Madrid.
Ir-rebbieħ tat-Tazza tad-Dinja skorja 28 goal f’Ligue 1 biex għen lil PSG jirbħu t- titlu 2021-22.
Haaland, 21 sena, qed jingħaqad ma’ Manchester City mingħand Borussia Dortmund wara li City attivaw il-klawsola ta’ rilaxx tiegħu ta’ £51.2m. Sieħbu l-ġdid tas-City, Ruben Dias, huwa l-aktar difensur siewi fid-disa’ post (£93.6m).
Il-Player tas-Sena tal-Premier League, Kevin de Bruyne, 30 sena, ta’ Manchester City, huwa l-ixjeħ player fl-Aqwa 100 (£48.9m) u Gavi, 17-il sena ta’ Barcelona (£49.9m) huwa l-iżgħar wieħed.
Intant, Gianluigi Donnarumma ta’ PSG, li rebaħ il-Kampjonat Ewropew mal-Italja, huwa l-aktar goalkeeper siewi fil-41 post (£62.9m).
Ir-runners-up tal-Premier u ċ-Champions League ta’ dan l-istaġun, Liverpool, huma rappreżentati mal-ewwel 10 billi f’Jannar iffirmaw lil Luis Diaz (£94m).
Pedri, Frenkie de Jong u Ferran Torres ta’ Barcelona, jinsabu fl-ewwel 10 waqt li l-internazzjonali Ingliżi, Jadon Sancho (£88.1m), Mason Mount (£85.7m) u Bukayo Saka (£85.6m) huma klassifikati fit-13, fl-14-il u fil-15-il post rispettivament.
Darwin Nunez, li ssemma’ ħafna ma’ trasferiment minn Benfica, għandu l-ogħla valutazzjoni (£59.9m) għal players barra mill-aqwa ħames kampjonati Ewropej.