Il-Forzi Armati ta’ Malta nhar it-Tnejn kienu mpenjati biex jevakwaw persuna li kellha bżonn attenzjoni medika.
Fi stqarrija l-AFM qalet li ċ-Ċentru ta’ Koordinazzjoni Għas-Salvataġġ irċieva talba għall-għajnuna għal persuna li kellha bżonn attenzjoni medika abbord bastiment barra mill-Belt Valletta.
“Ħelikopter tal-Forzi Armati ta’ Malta ntbagħat immedjatament fuq il-post biex iwettaq evakwazzjoni medika. Minkejja l-kundizzjonijiet ħżiena tat-temp, il-persuna ġiet irkuprata b’suċċess mill-bastiment u ttellgħet abbord il-ħelikopter tal-Forzi Armati ta’ Malta. Wara li l-ħelikopter niżel, il-persuna ġiet mgħoddija lit-tim mediku tal-Isptar Mater Dei sabiex tirċievi aktar kura medika,” itemm tgħid l-istqarrija tal-Forzi Armati ta’ Malta.