L-Ajruport ta’ Heathrow qiegħed javża li xi titjiriet fis-sigħat li ġejjin mistennija jiġu mċaqalqin biex jiġi żgurat is-silenzju fuq iċ-ċentru ta’ Londra hekk kif it-tebut tar-Reġina jiġi trasportat lejn Westminster Hall.
Dan jista’ jwassal għal xi kanċellazzjonijiet jew xi titjiriet li jiġu skedati mill-ġdid. Aktar bidliet huma mistennija jsiru dakinhar tal-funeral, b’aktar dettalji mistennija jinħarġu fil-jiem li ġejjin.
Kelliem għall-ajruport qal li “B’rispett għall-perjodu ta’ luttu wara l-mewt tal-Maestà Tagħha r-Reġina Eliżabetta II, se jkunu qegħdin isiru t-tibdiliet li hemm bżonn fl-operat tagħhom.
Xi titjiriet bejn is-1:50 p.m u l-3:40 p.m mistennija jaraw dan it-tibdil biex ikun żgurat is-silenzju fuq iċ-ċentru ta’ Londra hekk kif il-purċissjoni ċerimonjali timxi minn Buckingham Palace għal Westminster Hall.
Il-passiġġieri se jiġu notifikati direttament mil-linji tal-ajru tagħhom bi kwalunkwe tibdil fit-titjiriet.
