Settur kruċjali li għal snin twal kien maħkum minn nuqqas kbir kien dak tal-akkomodazzjoni soċjali. Saħansitra kien hemm snin fejn il-lista ta’ nies jistennew li jingħataw saqaw diċenti fuq rashom kienet waħda twila. B’danakollu, fl-aħħar snin, din il-problema kienet qed tkompli titla’ fil-wiċċ tant li l-Gvern ħass il-ħtieġa li jimbarka fuq diversi miżura biex kemm jista’ jkun tittaffa’ din is-sitwazzjoni. Tant hu li ngħatat spinta kbira lil dan is-settur fejn anke ġie maħtur Ministeru responsabbli speċifikatament minn dan il-qasam.
F’dan l-ambitu, il-lista ta’ nies li qed jistennew li jingħataw akkomodazzjoni soċjali qed narawha tonqos b’mod tanġibbli u dan permezz ta’ diversi proġetti li qed jiġu żviluppati u li jridu jitlestew sas-sena d-dieħla. Minbarra f’dan intefqu miljuni ta’ ewro biex l-oqsma ta’ djar tal-Gvern jiġu riġenerati u jibqgħu jinżammu fl-aħjar stat ta’ manutenzjoni
B’żieda ma’ dan, hemm l-għajnuna dejjem tiżdied, fosthom lill-first time buyers u anke l-introduzzjoni ta’ skemi oħra bħal “Nikru biex Nassistu” fejn is-sidien ta’ djar jistgħu jikru l-proprjetà tagħhom għal 10 snin lill-Awtorità tad-Djar għal skop ta’ akkomodazzjoni soċjali.
Imma filwaqt li hemm ħemel ta’ miżuri li ġew introdotti fil-budgets ta’ dawn l-aħħar snin, issa l-Gvern qed imur pass oltre u qed jiffoka wkoll fuq housing li jkun wieħed affordabli.
Fil-fatt, kif ħabbar il-Prim Ministru Robert Abela nnifsu, fil-jiem li ġejjin se jkunu qegħdin jitniedu diversi proġetti ta’ housing affordabbli. U f’dan ir-rigward għandna għax nifhmu li għaddejja ħidma intensiva biex fi żmien qasir ikun qed issir possibbli li jkun hawn ammont ta’ djar li jitpoġġew fis-suq b’rati affordabli.
Nemmnu għalhekk li din hija miżura oħra li se tħalli l-beneffiċji tagħha. B’mod partikolari għal familji, individwi u ħaddiema bi dħul medju, biex ikunu jistgħu jsibu alternattivi diċenti fis-suq u b’hekk il-ħolma tagħhom issir ukoll realtà. Irridu nirrikonoxxu li pajjiżna, minħabba ċ-ċokon tiegħu, m’għandux il-lussu li jippermetti bini bla kontroll. Għalhekk irridu naħsbu f’metodi oħra alternattivi ta’ akkomodazzjoni.
Minbarra f’dan, il-Gvern se jkun qiegħed jinvesti aktar flus biex iwettaq miżura soċjali oħra f’dan il-qasam, billi fiż-żmien li ġej se jwessa’ l-miżura tal-equity sharing, fejn il-Gvern jidħol bi sħab max-xerrej biex jixtri proprjetà. Din kienet miżura li ħalliet il-ġid u bħalissa hi miftuħa għal dawk li għandhom minn 30 sena ’l fuq, b’dan però issa se tkun qiegħda titwessa’ wkoll għal dawn li għandhom minn 25 sena ’l fuq.
F’dan il-kuntest, nemmnu li l-Gvern qiegħed jinvesti l-enerġija u l-ħidma tiegħu f’għajnuniet lin-nies sabiex dawn jibqgħu jgħixu tajjeb u jibqa’ jkollhom aktar flus fil-but. U din l-għajnuna tista’ tkun intiża għal dawk li jridu jagħmlu dan il-pass ‘il quddiem f’ħajjithom.