Abner Aquilina ġie ffilmjat jgħid lill-pulizija li huwa qatel imbagħad stupra lil Paulina Dembska u li x-xitan kien qallu biex “joqtol aktar nies.”
Dan intqal mill-Ispettur Wayne Camilleri meta kien qed jixhed fil-kumpilazzjoni kontra Aquilina li jinsab mixli bil-qtil u l-istupru tal-Pollakka fi Ġnien l-Indipendenza f’Tas-Sliema nhar it-2 ta’ Jannar li għadda.
L-Ispettur Wayne Camilleri, xehed fil-Qorti li Aquilina kien ammetta l-qtil meta kien arrestat għall-ħabta tas-6.00 a.m. b’rabta mal-kommissjoni li kien qajjem fil-Knisja tal-Balluta.
Huwa kien ittieħed fiċ-ċentru tas-saħħa tal-Floriana fejn bodycams irreġistrawh jgħid lill-uffiċjali li x-xitan kien qallu biex jagħmel xi ħaġa u li kien wettaq biss “33% tal-pjan.”
“Dak li sar, sar. Qtilt persuna u mbagħad stuprajtha,” huwa nstema’ jgħid fil-filmat. “Ma ridtx inweġġagħha daqshekk. L-ewwel ppruvajt nattakka żewġt irġiel iżda mbagħad ħsibt aħjar persuna waħda.”
Ix-xhud kompla jgħid li meta Abner kien mistoqsi kif allegatament kien qatel lil Dembska, huwa kien għamel sinjali ta’ daqqiet ta’ ponn u bis-sieq. Madankollu huwa ma rrepetiex din l-ammissjoni waqt l-ebda waħda mis-sitt interrogazzjonijiet uffiċjali tiegħu, fil-preżenza tal-avukat tiegħu, Dr Mario Mifsud.
L-Avukat Mifsud staqsa jekk il-klijent tiegħu kinux qalulu li kien qed jiġi rrekordjat. L-Ispettur Camilleri qal li Aquilina kien infurmat bil-bodycams u saħansitra f’xi ħinijiet beda jitkellem direttament fil-cameras.
Waqt l-interrogazzjoni uffiċjali iżda, il-pulizija xehdu li l-akkużat kien tkellem fuq “frekwenzi” u “kalamiti li jikkontrollaw moħħu” meta kien mistoqsi mill-uffiċjali jispjega dwar il-qtil u ġie anke muri ritratti tal-vittma.
Fil-Qorti ħareġ ukoll li fi tmiem l-interrogazzjoni, l-akkużat kien qal lill-pulizija, bi tbissima sarkastika fuq wiċċu, li l-isforzi tagħhom kienu “A++. Kontu qrib” u li huwa kien “qrib li jammetti iżda ma rnexxilhomx.”
Sadanittant, fil-Qorti xehed ukoll l-Ispettur Shawn Pawney, li semma li kien hemm rapporti oħra dwar nisa żgħażagħ li allegatament kienu ffastidjati minn Aquilina fil-passat.
L-Ispettur semma kif l-akkużat allegatament kien bagħat messaġġi lil żagħżugħa fejn indika li kien se jagħmel xi ħaġa magħha kieku ommha ma kinitx preżenti u bagħatilha ritratt tal-isperma tiegħu fuq tissue.
Preżenti fil-Qorti jisimgħu x-xhieda kien hemm ukoll il-familjari tal-vittma. Aquilina ma kienx preżenti għal din is-seduta minħabba li ntqal li ma kienx fi stat ta’ saħħa tajba.
