KAYNE SAID – Maniġer għal Komunikazzjoni
[email protected]
Il-logħob tal-azzard problematiku hu sfida serja li tista’ tħalli effetti devastanti fuq il-persuna u dawk ta’ madwarha. Waħda mill-konsegwenzi l-aktar komuni u ta’ impatt b’saħħtu hi l-aljenazzjoni soċjali. Meta persuna ssir dipendenti fuq il-logħob tal-azzard, is-soċjetà tibda titbiegħed minnha, jew inkella tkun hi stess li tinqata’ għal kollox, jew minħabba sens ta’ mistħija jew minħabba l-effetti negattivi li l-vizzju jġib miegħu.
L-ewwel u l-aktar impatt immedjat jidher fil-qasam tal-familja. Il-logħob tal-azzard eċċessiv jista’ jwassal għal problemi finanzjarji serji, inkluż dejn kbir, telf ta’ propjetà u anke falliment ekonomiku. Dawn il-problemi joħolqu tensjoni u kunflitti mal-membri tal-familja, speċjalment jekk il-persuna tibda tigdeb jew taħbi d-diffikultajiet tagħha. Jista’ jkun hemm każijiet fejn il-koppja tidħol f’argumenti kontinwi, jew saħansitra separazzjoni u divorzju. It-tfal ta’ dawk li jbatu mill-problema tal-logħob tal-azzard jistgħu jħossuhom mitlufa, anke abbandunati emozzjonalment.
Il-ġenitur dipendenti fuq il-logħob tal-azzard jista’ jitlef il-konnessjoni mal-ulied tiegħu minħabba nuqqas ta’ attenzjoni, preokkupazzjoni kontinwa bil-flus, u anke nuqqas ta’ stabbiltà fid-dar.
Il-problemi finanzjarji u l-imġiba ossessiva tal-logħob tal-azzard ħafna drabi jwasslu biex il-persuna titlef l-appoġġ tal-ħbieb. Ħafna drabi, persuni b’din il-problema jissellfu l-flus jew jagħmlu wegħdiet foloz biex ikomplu l-vizzju tagħhom, u dan iwassal għal nuqqas ta’ fiduċja u eventwalment għall-irtirar mis-soċjetà.
Anke f’ambjent tax-xogħol, individwu li jkun qed jitħabat bil-problemi tal-logħob tal-azzard jista’ jkollu telf ta’ konċentrazzjoni, assenteiżmu jew saħansitra jkollu problemi ta’ dixxiplina, li jistgħu jwasslu għal tkeċċija. Dan ikompli jikkontribwixxi għall-izolazzjoni u jagħmilha aktar diffiċli għall-persuna li terġa’ lura għal ħajja normali.
Minbarra l-impatt fuq ir-relazzjonijiet u s-soċjetà, l-aljenazzjoni tista’ taffettwa b’mod serju wkoll is-saħħa mentali tal-persuna. Ħafna individwi li jesperjenzaw il-logħob tal-azzard problematiku jibdew iħossu sens ta’ solitudni, dipressjoni, u ansjetà estrema.
Xi drabi, dawn is-sentimenti jwasslu għal abbuż ta’ sustanzi jew saħansitra ħsibijiet suwiċidali.
L-aljenazzjoni bħala riżultat tal-logħob tal-azzard problematiku hija problema serja li tolqot l-aspetti kollha tal-ħajja ta’ individwu.
L-aħjar mod biex jiġu evitati dawn il-konsegwenzi huwa permezz ta’ għarfien, prevenzjoni, u appoġġ adegwat kemm mill-familja kif ukoll minn professjonisti tas-saħħa mentali.
Is-sapport hu essenzjali biex persuna terġa’ ssib it-triq lura lejn ħajja bilanċjata u mingħajr dipendenza fuq il-logħob tal-azzard.
