Minn MELVIN FARRUGIA
L-Ambaxxatur Malti fil-Libja, Charles Saliba esprima l-apprezzament tiegħu lejn ix-xogħol bla waqfien li sar mill-Gwardja tal-Kosta Libjana biex issalva l-ħajjiet fil-baħar Mediterran.
Saliba esprima l-gratitudni tiegħu anke lill-baħrin abbord il-patrol boats tal-Gwardja tal-Kosta Libjana li jirriskjaw ħajjithom biex isalvaw lill-oħrajn.
Din l-istqarrija tal-ambaxxatur Malti saret wara li l-Prim Ministru Malti, Robert Abela żar il-Libja u ż-żewġ pajjiżi qablu li jikkoperaw biex ikissru l-katina tat-traffikar tal-immigranti, filwaqt li jsalvaw il-ħajjiet u jevitaw it-traġedji fil-Mediterran.
L-Ambaxxatur Malti għamilha ċara li hi prijorità għal Malta li jkun hemm l-istabilità fil-Libja, filwaqt li qal li Malta għandha pożizzjoni strateġika li permezz tagħha tista’ tikkontribwixxi għall-istabilità fil-Libja.
Għaldaqstant, hu ħeġġeġ lill-pajjiżi kollha biex ikunu responsabbli u jirrispettaw l-embargo fuq l-armi. Finalment, l-ambaxxatur Malti qal li bħalma jgħid il-Ministru għall-Affarijiet Barranin Malti, Evarist Bartolo, il-Libja għandha tkun tal-Libjani. Saħaq li Malta se tkompli tassisti, anke minkejja r-riżorsi limitati li għandna, biex finalment il-Libjani jkollhom dak li jixraqilhom.
Intant, fl-aħħar jiem, il-Ministru Evarist Bartolo rringrazzja lill-Gvern ta’ Sarraj u qal li minkejja l-inkwiet tal-gwerra u tal-pandemij, u minkejja l-mezzi limitati ħafna, dawn irnexxielhom iwaqqfu lit-traffikanti tal-bnedmin milli jibagħtu 2,000 immigrant ieħor lejn pajjiżna.
Qal li dan kien grazzi għax-xogħol li sar mill-Gvern ma’ dak ta’ Sarraj, fejn infetħet paġna ġdida ta’ koperazzjoni li diġà qiegħda tagħti l-frott minkejja li s’issa saru biss passi żgħar u għad fadal ħafna xi jsir.
Bartolo rringrazzja wkoll lill-Gvern Tork li ta sehmu biex tinfetaħ din il-paġna ġdida mal-Gvern ta’ Sarraj fi Tripli.
