Mal-50 baqra lbieraħ tressqu biex jiġu ġġudikati minn żewġ professjonisti Ġermaniżi li nġiebu apposta biex jiġġudikaw dawn il-baqar fl-akbar wirja agrikola ta’ pajjiżna, l-AgriFair.
Il-wirja kienet maqsuma f’erba’ kategoriji, li jiġbru fihom l-iktar razez importanti fil-produzzjoni tal-ħalib. Tressqu l-ewwel il-baqar tar-razza Jersey, li hi l-iżgħar razza tal-ħalib fid-dinja, warajhom ir-razza Brown Swiss, segwiti mir-razza tal-Ħomor magħrufin bħala Red Holstein, imbagħad intemmet il-wirja bl-aktar razza komuni dik tas-suwed u bojod, il-Black and White Holstein.
Kull kategorija imbagħad kienet maqsuma fi tliet klassijiet – il-baqar li welldu darba, dawk li welldu darbtejn u dawk li welldu tliet darbiet jew iktar. Minn kull klassi, ntgħażlu l-aqwa żewġ baqriet sakemm minn fost dawn imbagħad ntgħażlu l-aqwa u t-tieni l-aqwa minn fost il-baqar kollha fil-wirja.
Ir-rebbieħa tal-kategoriji kollha:
| Kategorija | Isem sid il-baqra |
| Jersey Champion | Matthew Calleja |
| Jersey Reserve Champion | Anthony Axisa |
| Champion Brown Swiss | Christian Borg |
| Reserve Champion Brown Swiss | Christian Borg |
| Champion Red and White | Christian Borg |
| Reserve Champion Red and White | Christian Borg |
| Champion Black and White | Christian Borg |
| Reserve Champion Black and White | Christian Borg |
| Grand Champion | Christian Borg |
| Reserve Grand Champion | Christian Borg |
Dan is-sit tkellem mal-Farm Service Manager tal-KPH Vince Parnis li qalilna li sodisfatt immens bil-livell li ntlaħaq f’din il-wirja. Barra minn hekk, huwa xtaq jiċċara li l-aqwa żewġ baqriet tal-wirja huma żewġ baqriet imwielda f’pajjiżna minn tagħmir artifiċjali impurtat mill-Amerika mill-istess KPH.
