Arġentina…………..3
Kroazja………………0
L-Arġentina ftit li xejn tħabtu biex għelbu l-isfida tal-Kroazja bl-iskor ta’ 3-0, u b’hekk kisbu l-passaġġ għall-finali ta’ nhar il-Ħadd, fejn se jkunu qed jaffrontaw lir-rebbieħ tal-konfront tal-lum bejn Franza u l-Marokk. Għalihom spikka ferm Julian Alvarez kif ukoll il-fenomenu Lionel Messi.
Fl-34 minuta, l-Arġentina rebħu penalty meta l-goalkeeper Kroat Dominik Livakovic waqqa’ lil Julian Alvarez fil-kaxxa, bil-ballun ikun indirizzat lejn il-lasta iżda Dejan Lovren salva minn fuq il-linja fatali. Mill-11-il metru nkariga ruħu l-captain Lionel Messi li ma żbaljax hekk kif permezz ta’ xutt b’saħħtu tefa’ l-ballun fir-rokna tas-saqaf tax-xibka.
L-Arġentini rduppjaw l-iskor ħames minuti biss wara, bi ġmiel ta’ goal meta Lionel Messi għadda tajjeb lejn Julian Alvarez li qabeż tliet avversarji, avvanza fil-kaxxa u mill-viċin tefa’ ġewwa, f’goal li fakkar lil ħafna f’dak tal-ex player leġġendarju Diego Armando Maradona fit-Tazza tad-Dinja tal-1986 fil-Messiku kontra l-Ingilterra. M’hemmx dubju li dan il-goal se jkun kontendent ewlieni għall-isbaħ goal matul din l-edizzjoni tat-Tazza tad-Dinja.
Fit-tieni taqsima, kompla d-dominju assolut Arġentin u fid-69 minuta, huma ssiġillaw ir-rebħa permezz tat-tielet goal meta Messi temm azzjoni personali mill-isbaħ billi serva fuq platt tal-fidda lil Julian Alvarez li minn taħt il-lasta tefa’ ġewwa, biex b’hekk irreġistra doppjetta personali.
Arġentina: Damian Martinez, Nahuel Molina (Juan Foyth 86), Cristian Romero, Nicolas Otamendi, Nicolas Tagliafico, Rodrigo De Paul (Exequiel Palacios 74), Enzo Fernandez, Leandro Paredes (Lisandro Martinez 62), Alexis Mac Allister (Angel Correa 86), Lionel Messi, Julian Alvarez (Paulo Dybala 74) Coach: Lionel Scaloni
Kroazja: Dominik Livakovic, Josip Juranovic, Dejan Lovren, Josko Guardiol, Borna Sosa (Mislav Orsic 46), Luka Modric (Lovro Majer 81), Marcelo Brozovic (Bruno Petkovic 50), Mateo Kovacic, Mario Pasalic (Nikola Vlasic 46), Andrej Kramaric (Marko Livaja 72), Ivan Perisic Coach: Zlatko Dalic
Referee: Daniele Orsato (Italja)
Ammoniti: D. Livakovic, M. Kovacic (K), C. Romero, N. Otamendi (A)
