L-Avukat Jason Azzopardi nstab ħati li ġibed filmat tal-Prim Ministru Robert Abela u l-Ministru għall-Ġustizzja u r-Riforma fis-Settur tal-Kostruzzjoni Jonathan Attard, mingħajr permess fil-Qorti. Ta’ dan huwa kien immultat €1,000.
Il-każ seħħ fit-2 ta’ Diċembru 2024, għall-ħabta tad-9.17 a.m. Fil-Qorti nstema’ kif il-Kap Eżekuttiv tal-Aġenzija għas-Servizzi tal-Qrati kienet infurmata li kien qed jiġi mxandar filmat tal-Prim Ministru u tal-Ministru tal-Ġustizzja waqt li kienu qegħdin fuq mejda fil-bini tal-Qorti wara li kienu attendew għal smiegħ ta’ kawża. Jingħad li ma kienx ingħata permess sabiex jittieħed tali filmat.
L-imputat, Dr Jason Azzopardi, kien tressaq il-Qorti fejn ġie akkużat li kien hu li ġibed tali filmat. Mix-xhieda mogħtija rriżulta li la l-Kap Eżekuttiv Ewlieni tal-Qorti u lanqas il-Prim Imħallef ma kienu taw permess sabiex jittieħed xi flmat fil-Qorti fid-data tal-akkuża.
Intant, il-marixxall ewlieni kien ikkonferma li rċieva struzzjoni biex jiġbor il-filmati mill-kameras tas-sigurtà u jgħaddihom lill-Kap Eżekuttiv tal-Qorti u hekk għamel u wara rċieva struzzjonijiet biex jittieħdu dawn il-proċeduri fil-konfront tal-imputat.
FIl-kunsiderazzjonijiet tagħha, il-Qorti preseduta mill-Maġistrat Monica Vella rat u pparagunat żewġ filmati, dak ta’ Net News u l-ieħor mill-kameras tas-sigurtà tal-Qorti.
Intqal li l-elementi tal-footage li ġie ppreżentat fuq Net News kienu preżenti biss “onsite” fix-xena għal sekonda, tnejn, tlieta. F’dik is-sekonda, tnejn, tlieta, l-unika bniedem li jgħaddi minn hemmhekk huwa Dr Jason Azzopardi. Ma jidher ħadd aktar ħliefu f’dawn il-ftit sekondi.
Il-Qorti nnutat ukoll li l-angolatura ta’ kif jidher il-filmat taqbel ma’ angolatura ta’ kif persuna żżomm mobile ma’ widintha meta tkun se ċċempel jew tirrispondi telefonata, kif jidher ukoll li kien qed jagħmel Dr Azzopardi waqt li għadda maġenb l-imsemmija mejda.
Min-naħa tagħha, id-Difiża qalet li l-Prosekuzzjoni ma ġabitx l-aqwa prova u li l-provi ċirkostanzjali mhumiex biżżejjed f’dan il-każ.
Il-Qorti wara li fliet bir-reqqa l-filmati mressqa, waslet għall-konklużjoni li l-filmat li ġie muri fil-media ma setax ittieħed minn ħadd aktar għajr mill-imputat u dan għaliex il-provi kollha jippuntaw inekwivokament lejh stess.
Kien għalhekk li l-Qorti sabet lil Dr Jason Azzopardi ħati tal-akkuża miġjuba kontrih u kkundannatu għal ħlas ta’ multa ta’ €1,000.
Sadanittant, l-Avukat Jason Azzopardi kiteb fuq Facebook li se jkun qed jappella minn din is-sentenza.
