L-ewwel darba bl-orħos prezz tal-petrol fiż-żona ewro

Informazzjoni maħruġa kull ġimgħa mill-Kummisjoni Ewropea – il-weekly oil bullettin – jindika li għall-ewwel darba l-prezz tal-petrol f’Malta huwa l-irħas fiż-żona ewro. Il-prezz tad-diżil ta’ pajjiżna issa ilu l-irħas fiż-żona ewro minn ftit qabel tħabbar il-budget għall-2022. Bl-iżviluppi li seħħew fl-aħħar ġimgħa issa jirriżulta li l-familji Maltin u Għawdxin huma dawk fiż-żona ewro li lanqas iħallsu għall-fjuwil.

Kumparat ma’ sena ilu madwar iż-żona ewro l-prezz tal-petrol żdied b’37 ċenteżmu mentri dak tad-diżil tela b’39 ċenteżmu. B’kuntrast f’pajjiżna l-prezz baqa’ stabbli u m’għoliex. Fil-fatt mindu laħaq Prim Ministru Dr Robert Abela f’Jannar 2020, l-prezz tal-petrol u d-diżil f’pajjiżna raħas b’7 ċenteżmu. Malta hija l-uniku pajjiż fiż-żona ewro fejn il-prezz tal-fjuwil illum huwa orħos milli kien qabel bdiet il-pandemija. B’kuntrast fil-Ġermanja l-petrol illum huwa 39 ċenteżmu aktar għoli milli kien fl-2020, mentri d-diżil huwa 36 ċenteżmu aktar.

Din il-ġimgħa persuna li xtrat litru petrol minn pompa f’Malta ħalset 69c anqas minn persuna li xtrat l-istess litru petrol imma minn pompa fl-Olanda. Ma hemmx bżonn wieħed imur daqshekk ’il bogħod. Minn pompa tal-fjuwil fi Sqallija, minflok tonfoq €30 fuq petrol tispiċċa tonfoq kważi €41 għall-istess ammont ta’ petrol. Id-distakk fil-poter tal-akkwist huwa anke akbar jekk tkun issuq karozza taħdem bid-diżil għax f’dak il-każ minflok tonfoq €30 tispiċċa tonfoq €42 għall-istess ammont ta’ diżil. Fuq medda ta’ sena dan ikun ifisser spiża akbar ta’ €624 għall-istess ammont ta’ diżil.

Ta’ min ifakkar li f’Marzu 2013, meta l-prezz internazzjonali taż-żejt f’termini ta’ ewro kien bħalma huwa llum il-prezz ta’ litru petrol f’Malta kien €1.48 mentri d-diżil kien €1.38. Dan jikkonferma kemm Gvern Nazzjonalista kien jimponi piżijiet fuq il-familji ferm għoljin. Fil-fatt taħt Gvern Nazzjonalista l-prezz tal-petrol kien tela b’36%, jew bid-doppju ta’ dak li kien seħħ fil-bqija tal-Ewropa.