Il-Valletta Grand Prix Foundation tħabbar li b’dispjaċir illi ma kellhiex triq oħra għajr li tikkanċella it-tlettax-il edizzjoni tal-Mdina Grand Prix.
Din id-deċiżjoni qed tittieħed wara li d-diskussjonijiet mal-awtoritajiet ġew konklużi din il-ġimgħa. Filwaqt li l-kumitat tal-Valletta Grand Prix Foundation jilqa’ d-diskussjonijiet li saru mal-awtoritajiet inklużi l-kunsilli lokali involuti, il-pulizija, Transport Malta u oħrajn, jirriżulta li kien se jkun ferm diffiċli biex isir ix-xogħol kollu neċessarju u biex jintlaħqu l-kundizzjonijiet mitluba, filwaqt li l-kumitat ikun qed jaħdem fuq il-loġistika biex jorganizza avveniment ta’ kwalita’, partikolarment arranġamenti relatati mal-parteċipanti barranin.
Il-Malta Classic m’huwiex sempliċi avveniment tal-motorsport għall-entużjasti tal-karozz klassiċi, imma esperjenza anke għal kulħadd. Permezz ta’ dan l-avveniment, wieħed jissottolinja l-isbuħija ta’ Malta, l-esperjenza li tkun f’paddock, il-possibbilta’ li wieħed jammira karozzi klassiċi varji, uħud minnhom uniċi, u l-eċitament tal-Grand Prix innifsu. It-team wara l-MaltaClassic huwa kburi li jpoġġi lil-Malta fuq il-mappa bħala destinazzjoni għall-entużjasti tal-karozzi u turisti oħrajn. Permezz ta’ dan l-avveniment naraw zjarat minn varji ġurnalisti u fotografi internazzjonali li jattendu l-avveniment. Il-MaltaClassic huwa wkoll avveniment li jiġi rappurtat fuq diversi rivisti tal-motorsport u lifestyle internazzjonali.
Il-kumitat tal-MaltaClassic qed jisħaq li se jkun qed jibda’ jaħdem minnufih biex isiru t-tħejjijiet xierqa għall-edizzjoni tal-2023 f’kollaborazzjoni sħiħa u djalogu kontinwu mal-kunsilli lokali, Transport Malta u l-Pulizija. Dan biex joħorġu il-permessi rispettivi mill-aktar fis possibbli u s-sitwazzjoni li nħolqot din is-sena, ma terġax tirrepeti ruħha.
L-organizzaturi jixtiequ jirringrazzjaw lill-awtoritajiet li b’xi mod jew ieħor għenu biex jinstabu soluzzjonijiet biex il-Grand Prix jkun jista’ jseħħ. Il-Valletta Grand Prix Foundation se tkun qed toħroġ stqarrija oħra fil-futur qarib biex tħabbar l-edizzjoni tal-MaltaClassic tas-sena d-dieħla.
Il-Kumitat Organizzattiv
