Minn Cristian Muscat
Kif bdiet l-imħabba tiegħek lejn il-futbol?
Minn ta’ etá żgħira kont inħobb il-futbol. Missieri min dejjem kien jagħtini s-sapport tiegħu kif ukoll il-familja tiegħi.
Iddeskrivi l-esperjenza preżenti tiegħek ma’ Mqabba FC.
L-esperjenza tiegħi mal-Mqabba din is-sena kienet waħda sabiħa ħafna hekk kif bħala tim wieħed aħna lhaqna t-tragward tagħna billi ġejna promossi għan-National Amateur League 1. Madankollu l-klabb dejjem għamel li seta’ biex b’hekk jara lilna l-plejers kuntenti u nimxu ‘l quddiem.
X’tikkummenta fuq il-kowċ Claudio Calleja, il-president Terrance Briffa u t-team manager Louis Agius?
Il-kowċ Claudio Calleja, il-president Terrance Briffa u t-team manager Louis Agius ħadmu ħafna biex wasalna s’hawn. Huma dejjem għamlu minn kollox biex ikollna staġun mill-aqwa u wieħed memorabbli. Dejjem raw x’hemm bżonn biex intejbu u nilħqu t-tragwardi tagħna.
X’taħseb li kien is-sigriet wara l-ksib tal-promozzjoni għan-National Amateur League 1 min-National Amateur League 2 minn Mqabba FC fil-jiem li għaddew?
Apparti li jrid ikun hemm id-determinazzjoni u d-dixxiplina minn kulħadd, irid ikun hemm ukoll ambjent tajjeb u l-għaqda speċjalment bejn il-plejers u nagħtu kuraġġ lil xulxin. Huwa importanti li kulħadd jiġbed ħabel wieħed u kulħadd ikollu għan wieħed.
Kif tqis il-livell tal-futbol Malti fil-preżent u kif rajtu jinbidel tul is-snin?
Nemmen li l-livell tal-futbol Malti qed jimxi ‘l’quddiem. Ħafna klabbs qed jagħmlu investiment fl-iskwadra tagħhom kif ukoll jaraw biex ikollhom faċiltajiet mill-aqwa għall-klabb tagħhom.
U dak tar-riżorsi (grawnds) fejn titħarrġu u tilagħbu l-logħob kompetittiv tagħkom?
Fejn jidħlu grawnds, ukoll kien hemm xi investiment … hemm xi grawnds li inbidlitilhom l-art tagħhom peró hemm ukoll xi grawnds li hemm bżonn fejn jitjiebu. Aħna bħala Mqabba FC għandna grawnd li ġie mibdul riċentement u dan kien ta’ vantaġġ għalina.
Kif qed tħares lejn il-futur tiegħek fil-futbol?
Bħalissa ninsab kuntent ħafna li lħaqna t-tragwardi tagħna, peró, nimxi pass pass u nevalwa l-opportunitajiet tiegħi biex b’hekk nagħmel l-aħjar pass li jmiss għalija.
Għaddi messaġġ finali lil min jixtieq jagħmel karriera ta’ suċċess fil-futbol.
Fil-futbol dejjem ħa jkun hemm il-mumenti sbieħ peró jkun hemm ukoll dawk diffiċli. L-importanti hu li ma taqtax qalbek u dejjem tagħti l-mija fil-mija tiegħek!
