L-Ispeaker tal-Kamra tad-Deputati, Anġlu Farrugia, fetaħ uffiċjalment wirja tal-inbid fil-Parlament ta’ Malta fejn iddeskriva l-inbid bħala prodott antik daqs iċ-ċivilizzazzjoni nnifisha. Fid-diskors tiegħu, fakkar li l-eqdem evidenza tal-inbid tmur lura madwar 8,000 sena għall-widien tal-Georgia u l-Mesopotamja, fejn il-bnedmin għall-ewwel darba ttrasformaw l-għenba umli f’xi ħaġa aktar dejjiema. Minn dakinhar, l-inbid ivvjaġġa magħna fl-istorja, imferra’ fit-tempji tal-Eġizzjani, imfaħħar mill-filosfi Griegi u onorat fil-festi Rumani.
L-Ispeaker innota li hawn f’Malta, l-inbid ilu wkoll parti mill-istorja tagħna għal sekli sħaħ. Il-Feniċi u r-Rumani kkultivaw id-dwieli fil-gżejjer tagħna, u llum l-industrija tal-inbid tagħna saret simbolu ta’ reżiljenza u kreattività.
Il-Parlment… mhux biss kamra leġiżlattiva
L-inbid Malti mhux biss jakkumpanja l-ikliet tagħna; iġorr it-togħma tal-ħamrija tagħna, il-klima tagħna, u l-kultura tagħna. Huwa żied jgħid li f’dawn l-aħħar snin Malta bdiet ukoll tesporta l-inbejjed tagħha barra minn Malta u b’hekk toffri lis-swieq internazzjonali espressjoni Mediterranja unika — waħda li hija żgħira fid-daqs iżda rikka fil-karattru.
L-Ispeaker Farrugia enfasizza li r-rwol tal-Parlament fil-ftuħ tal-bibien tiegħu għal wirja bħal din huwa li jafferma mill-ġdid li mhux biss kamra leġiżlattiva iżda wkoll dar nazzjonali għall-kultura, id-djalogu u l-identità. L-Ispeaker Farrugia kkonkluda billi stqarr li m’għandniex naraw l-inbid biss bħala prodott tal-agrikoltura jew il-gastronomija, iżda wkoll bħala riflessjoni tal-vjaġġ twil tal-umanità — mill-ewwel vinji eluf ta’ snin ilu, sal-fliexken li niftħu llum fil-ħbiberija, il-kultura u l-ferħ.