L-Indja u l-Kanada rrestawraw ir-rabtiet tagħhom u ħabbru għadd ta’ ftehimiet, inkluż ftehim ta’ 10 snin dwar l-enerġija nukleari, wara li l-prim ministri taż-żewġ pajjiżi ltaqgħu f’Delhi biex jerġgħu jistabbilixxu r-rabtiet li kienu tfarrku minħabba tensjonijiet diplomatiċi.
Il-prim ministri Narendra Modi u Mark Carney laħqu wkoll ftehim f’oqsma bħat-teknoloġija, minerali kritiċi, l-ispazju, id-difiża u l-edukazzjoni. Qablu wkoll li jikkonkludu ftehim ta’ kummerċ ħieles, li ilu snin jitħejja, sa tmiem l-2026. Iż-żewġ pajjiżi jridu jnaqqsu l-esponiment tagħhom għal tariffi kummerċjali punittivi tal-president tal-Istati Uniti.
Taħt Carney, iż-żewġ gvernijiet qed jippruvaw isewwu r-rabtiet li kienu kważi ntemmu meta l-predeċessur tiegħu, Justin Trudeau, akkuża lil Indja b’rabta mal-assassinju tal-2023 tas-separatista Sikh Hardeep Singh Nijjar fuq art Kanadiża. L-Indja kienet ċaħdet bil-qawwa din l-allegazzjoni.
Iżda minn meta Carney ħa l-kariga s-sena l-oħra, ir-relazzjoni nbniet mill-ġdid b’kawtela megħjuna mill-fatt li l-gvern tiegħu qal li jemmen li l-Indja bħalissa mhijiex marbuta ma’ reati vjolenti jew theddid fuq art Kanadiża.
Madankollu, xi wħud fil-Kanada rribattew din l-istqarrija, inkluż membru parlamentari Liberali mill-partit ta’ Carney stess u membri tad-dijaspora Sikh fil-Kanada, li jgħidu li jemmnu li huma għadhom fil-mira tal-Indja.
L-aġenzija tal-ispjunaġġ tal-Kanada elenkat l-Indja tard is-sena l-oħra bħala wieħed mill-pajjiżi li qed iwettqu spjunaġġ u indħil barrani fil-pajjiż, flimkien mar-Russja, iċ-Ċina u l-Iran.
L-analisti jgħidu li d-deċiżjoni ta’ Carney li jħalli t-tensjonijiet diplomatiċi warajh u jestendi l-werqa taż-żebbuġa lill-Indja hija waħda pragmatika, ibbażata fuq il-bidliet ġeopolitiċi tal-lum.
L-istess jgħodd għall-Indja, li qed tfittex li toħloq sħubijiet kummerċjali ġodda biex tiddiversifika l-importazzjonijiet tagħha u tnaqqas ukoll id-dipendenza tagħha fuq ir-Russja għall-bżonnijiet tal-enerġija tagħha.
Stħarriġ wera li l-maġġoranza tal-pubbliku huma favur li li l-Kanada terġa’ tinvolvi ruħha mal-Indja. Stħarriġ reċenti mwettaq minn Angus Reid sab li nofs jemmnu li huwa l-waqt it-tajjeb biex jerġgħu jiġu stabbiliti r-rabtiet.
L-istħarriġ jissuġġerixxi wkoll li aktar Kanadiżi għandhom opinjoni favorevoli dwar l-Indja (30%) milli dwar l-Istati Uniti (26%), hekk kif il-Kanada qed tkompli tkun milquta mit-tariffi imposti mill-amministrazzjoni ta’ Trump.
