Minn Grupp B, fit-8.00 pm, f’konfront bejn żewġ timijiet Britanniċi, Wales jaffrontaw lill-Ingilterra.
Filwaqt li t-Three Lions jinsabu jillidjaw dan il-grupp u għandhom ċans tajjab li jispiċċaw bħala r-rebbieħa tiegħu, Wales, iridu jirbħu u jittamaw li r-riżultat bejn l-Iran u l-Istati Uniti jmur favur tagħhom.
Il-goalkeeper numru wieħed ta’ Wales Hennessey huwa sospiż wara li tkeċċa fit-telfa ta’ 2-0 kontra l-Iran u għaldaqstant, Danny Ward, se jingħata r-responsabbiltá biex jgħasses il-lasti.
Iż-żewġ eroj tagħhom, Gareth Bale u Aaron Ramsey, kienu prattikament ineżistenti kontra l-Iran, iżda Page xorta waħda mistenni juri fiduċja fihom.
Fir-rigward tal-Ingilterra, Southgate jista’ jkun qed jaħdem mal-iskwadra kollha għal din il-partita wara li laqa’ lil James Maddison lura għat-taħriġ minn injury fl-irkoppa … u għandu l-probema tal-lussu fl-għażla tal-formazzjoni inizjali.
Ir-ritorn ta’ Kyle Walker jista’ jara lill-player ta’ Manchester City jirritorna fuq in-naħa tal-lemin minflok Kieran Trippier, minkejja s-sejħiet għal Southgate biex jintroduċi lil Trent Alexander-Arnold.
Harry Kane għadu qed jistenna l-ewwel goal tiegħu f’din il-kompetizzjoni, iżda prattikament m’hemm l-ebda ċans li l-captain jitlef postu fl-attakk.
