“It-tranżizzjoni lejn turiżmu sostenibbli hi marbuta mill-qrib mal-Intelliġenza Artifiċjali (AI) u mat-trasformazzjoni diġitali li għaddejja bħalissa fl-industrija. L-AI rrivoluzzjonat ix-xejra turistika”.
Iddikjara dan id-Deputat Prim Ministru u Ministru għall-Affarijiet Barranin u t-Turiżmu Ian Borg meta kien qed jindirizza l-10 edizzjoni tal-Mediterranean Tourism Forum, bit-tema ta’ din is-sena tiffoka fuq is-sostenibilità, l-esperjenza u l-AI.
Fid-diskors tiegħu, id-Deputat Prim Ministru rrikonoxxa li għandna settur turistiku Mediterranju li qed jiffjorixxi fejn in-numri tat-turiżmu qed ikomplu jiżdiedu. Qal li għalkemm dan iwassal għal benefiċċji ekonomiċi u soċjali, iġib miegħu wkoll ċertu sfidi.
“Irridu nkomplu nsibu metodi ta’ kif nibbilanċjaw it-tkabbir fit-turiżmu mal-preservazzjoni tal-kultura, ir-riżorsi u l-popolazzjoni lokali,” tenna d-Deputat Prim Ministru. “Iċ-ċavetta biex dan isir huwa bl-iżvilupp ta’ mudelli ta’ turiżmu sostenibbli li jfittxu li jiksbu bilanċ ambjentali, soċjali u ekonomiku permezz ta’ mmaniġġjar bir-reqqa u ppjanar.”
Huwa kompla jgħid li bħala pajjiż qed nagħrfu l-benefiċċji kbar li ġejjin mill-Intelliġenza Artifiċjali u fil-fatt qed tiġi implimentata l-pjattaforma tal-AI fit-turiżmu. Din il-pjattaforma se tikkonsolida s-sorsi tad-data tradizzjonali sabiex jifhmu aħjar l-influssi tat-turiżmu, is-sentiment tal-viżitaturi u x-xejriet tas-suq.
“L-AI u d-data m’għadhomx biss l-għodod għall-futur imma huma strumenti essenzjali tal-governanza li jippermettu lid-destinazzjonijiet jantiċipaw l-isfidi, jimmaniġġjaw il-kapaċità u jkejlu l-impatt.”
Id-Deputat Prim Ministru tenna jgħid li l-politika tat-turiżmu ta’ Malta tfittex ukoll li timmassimizza l-opportunitajiet fejn filwaqt li qed ikun preservati t-tradizzjonijiet tagħna, qed jiġu żviluppati niċeċ ġodda li juru dak li pajjiżna huwa mogħni bih fosthom it-turiżmu reliġjuż u militari u anke l-kċina speċifika tagħna.
Huwa temm jgħid li “rridu nkomplu naħdmu flimkien biex niżguraw li r-reġjun tal-Mediterran jibqa’ attur globali kompetittiv ewlieni filwaqt li nattiraw viżitaturi minn madwar id-dinja kollha. Għandna ħafna x’noffru u flimkien nistgħu niffaċċjaw aħjar l-isfidi tagħna u nimmassimizzaw l-opportunitajiet.”
