Is-sid ta’ Chelsea, Roman Abramovich, intalab mill-Ukrajna biex jgħin biex jappoġġja t-tentattivi tagħhom biex jilħqu “riżoluzzjoni paċifika” mar-Russja, qal il-kelliem tal- biljunarju.
Huwa żied li Abramovich ġie kkuntattjat minn uffiċjali Ukreni u “ilu jipprova jgħin minn dak inhar”.
L-Ukrajna sejħet għal waqfien mill-ġlied qabel taħditiet għall-paċi fil-Belarus.
Il-President Russu Vladimir Putin nieda invażjoni militari tal-pajjiż ġar, l-Ukrajna, nhar il-Ħamis.
Il-Ministeru tas-Saħħa tal-Ukrajna qal nhar il-Ħadd li 352 persuna ċivili, inklużi 14-il tifel, kienu nqatlu minn meta bdiet l-invażjoni tar-Russja.
Abramovich ħabbar nhar is-Sibt li “l-amministrazzjoni u l-kura” tal-club ta’ Chelsea kienet qed tingħata lil-fiduċjarji tal-fondazzjoni tal-karità ta’ Chelsea FC.
Abramovich – li jibqa’ sid ta’ Chelsea b’£1.5 biljun mislufa lill-club – ma rreferiex għall-invażjoni tar-Russja tal-Ukrajna fl-istqarrija tiegħu.
Ir-raġel ta’ 55 sena huwa wieħed mill-aktar nies sinjuri tar-Russja u huwa maħsub li hu qrib il-President Russu, Putin.
Id-direttur u produttur tal-films Ukren, Alexander Rodnyansky, ikkonferma l-involviment tas-sid ta’ Chelsea f’tentattivi biex tintlaħaq riżoluzzjoni paċifika, iżda żied li huwa nċert mill-impatt li se jkollu.
“Nista’ nikkonferma li n-naħa tal-Ukrajna qed tipprova ssib xi ħadd fir-Russja lest li jgħinhom biex isibu riżoluzzjoni paċifika,” qal Rodnyansky.
“Huma konnessi ma’ Roman Abramovich permezz tal-kommunità Lhudija u laħqu miegħu għall-għajnuna. Abramovich ilu jipprova jimmobilizza appoġġ għal riżoluzzjoni paċifika minn dak inhar.
“Għalkemm l-influwenza ta’ Abramovich hija limitata, huwa l-uniku wieħed li wieġeb u ħa fuqu biex jipprova.
“Jekk dan ikollu impatt jew le, ma nafx, iżda jiena f’kuntatt mal-istaff tal-President tal-Ukrajna, Volodymyr Zelensky, jien stess, u naf li huma grati għall-isforzi ġenwini tiegħu.”
Għadu mhux magħruf jekk Abramovich hux se jiġi sanzjonat bħala parti mill-miżuri tal-gvern tar-Renju Unit kontra r-Russja, u l-fiduċjarji tal-fondazzjoni tal-karità ta’ Chelsea għadhom ma qablux li jieħdu l-kontroll tal-club.
Membri tal-fondazzjoni tal-karità ltaqgħu nhar il-Ħadd biex jiddiskutu s-sitwazzjoni, iżda xi wħud għandhom tħassib dwar jekk ir-regoli tal-Kummissjoni tal-Karità jippermettulhomx imexxu l-club bl-avukati tal- fondazzjoni qed jesploraw x’jista’ jsir.
