Ir-regolatur Amerikan għall-mediċina ta l-approvazzjoni tiegħu għall-użu tal-mediċina remdesivir biex iġu kkurati pazjenti pożittivi għall-Covid-19.
L-Amministrazzoni Amerikana għall-Ikel u l-Mediċina (FDA) qalet li l-mediċina Veklury (remdesivir) naqqset iż-żmien ta’ rkupru għal fejqan mill-Covid-19 b’ħamest ijiem waqt testijiet kliniċi li saru.
“Veklury hija l-ewwel trattament għall-Covid-19 li rċeviet l-approvazzjoni tal-FDA,” saħqet l-FDA fi stqarrija.
L-Għaqda Dinjija tas-Saħħa (WHO) il-ġimgħa li għaddiet qalet li r-remdisivir ftit li xejn kellha effett fuq il-kura ta’ pazjenti mill-Covid-19.
Il-WHO qalet li dan kien ibbażat minn fuq studju li għamlet hija, madankollu l-produttur tal-mediċina, Gilead, ċaħad ir-riżultati ta’ dan l-istudju.
Ir-remdesivir ilha awtoritazzata minn Mejju li għadda biex tintuża f’każi ta’ emerġenza fl-Istati Uniti. Riċentement ingħatat lill-President Amerikan Donald Trump wara li kien irriżulta pożittiv għall-Covid-19.
