It-Tim tar-Rokiterija tal-Università ta’ Malta żvela uffiċjalment ir-rokit iddisinjat mill-istudenti waqt avveniment li sar fil-Planetarium Hall ta’ Esplora, li jimmarka pass importanti fil-vjaġġ ta’ Malta lejn l-innovazzjoni ajruspazjali.
Dan ir-rokit se jirrappreżenta l-ewwel dħul ta’ Malta fil-European Rocketry Challenge (EuRoC) prestiġjuża, li tlaqqa’ flimkien timijiet universitarji minn madwar l-Ewropa biex juru eċċellenza teknika fir-rokiterija.
L-avveniment laqa’ lill-istudenti, lill-akkademiċi, u lill-partijiet ikkonċernati tas-settur pubbliku, filwaqt li enfasizza l-impenn dejjem jikber tal-Università għall-inġinerija applikata u għall-innovazzjoni relatata mal-ispazju.
“Dan il-proġett juri t-talent u l-ambizzjoni eċċezzjonali tal-istudenti tagħna u jirrifletti ddedikazzjoni tal-Università ta’ Malta li tappoġġja tagħlim prattiku u bbażat fuq ir-riċerka,” qal Dr Michael Quinton, rappreżentant ta’ Xjenza Malta, waqt il-kummenti tal-ftuħ.
It-Tim tar-Rokiterija tal-Università ta’ Malta, magħmul minn madwar 50 student minn diversi fakultajiet, qatta’ l-aħħar diversi xhur jiddisinja, jibni, u jittestja rokit kompletament funzjonali.
Fil-ġimgħat li ġejjin, ir-rokit se jgħaddi minn ħruq niexef tas-sistema ta’ propulsjoni tiegħu kif ukoll minn tnedija diretta ta’ test li jimmira għal altitudni ta’ kilometru.
Dawn l-istadji importanti huma essenzjali fit-tħejjija għall-EuRoC 2025 fil-Portugall, fejn ittim se jikkompeti biex jilħaq altitudni ta’ 3 kilometri.
It-tim huwa maqsum fi tliet oqsma ewlenin ta’ fokus.
Id-diviżjoni tad-Disinn tar-Rokits hi responsabbli għall-aspetti strutturali u ajrudinamiċi tar-rokit, li tiżgura l-istabbiltà u rreżiljenza matul it-titjira. Id-diviżjoni tad-Disinn tal-Propulsjoni tiżviluppa l-magna u ssistema ta’ propulsjoni b’enfasi fuq is-sikurezza, l-effiċjenza, u l-prestazzjoni għolja.
Sadanittant, id-diviżjoni tal-IT u t-Telemetrija tittratta l-iżvilupp tas-software, il-ġbir tad-dejta f’ħin reali, u l-monitoraġġ dirett matul l-ittestjar u t-titjira.
“Dak li beda bħala idea ambizzjuża fost l-istudenti kiber fi proġett ta’ inġinerija komplut b’sinifikat nazzjonali,” qal is-Sur Francesco Cini, Fundatur u President tar-Rokiterija talUniversità ta’ Malta.
Il-lejla ntemmet b’sessjoni ta’ networking u wiri mill-qrib tar-rokit, u offriet lill-parteċipanti lopportunità li jitgħallmu aktar dwar l-isfidi tekniċi u l-kisbiet tal-proġett.
