Din il-ġimgħa ser jiġi organizzat l-akbar avveniment ekwestri tas-sena, Golden Buckle. Bi preparazzjoni għal dan l-avveniment iltqajna ma’ Luigi Spina u Jonathan Pace d-diretturi ta’ Golden Buckle International sabiex nifhmu aħjar l-aħħar preparamenti għal dan l-avveniment, ir-rispons mill-parteċipanti u dak kollu li ser ikunu qedgħin jistennew dawk li ser iżżuru l-MFCC f’Ta’ Qali.
Golden Buckle huwa meqjus fost l-etużjasti tal-Barrel Racing bħala waħda mill-aktar kompetizzjonijiet innovattivi u li tiġbed interess fl-Ewropa u fl-Amerika.
Iltqajna ma’ Luigi u Jonathan fl-MFCC Ta’ Qali li fl-aħħar jiem ġiet mibdula f’arena bir-ramel sabiex tospita dawn il-kompetizzjonijiet. Waqt li bdejna niddiskutu, Luigi spjegalna għalfejn Golden Buckle għażlet lil Malta bħala l-pajjiż li ser ikun qiegħed jospita waħda mill-edizzjonijiet tal-kompetizzjoni din is-sena.
“Minkejja ċ-ċokon ta’ Malta, il-pajjiż huwa aċċessibbli ħafna u f’Malta hawn klima addattata għaż-żwiemel speċjalment fix-xhur tal-ħarifa u x-xitwa. Jien nofsni Malti u nofsni Taljan, u tul dawn is-snin li ilni ngħix Malta dejjem ħlomt li nressaq lejn Malta dan l-avveniment. Illum il-Maltin għandhom abilitajiet tajba ħafna fil-loġistika u l-organizzazjoni u din kienet waħda mir-raġunijiet ewlenin li inkoraġġietna niġu f’Malta sabiex nelevaw il-prodott tagħna”, kompla biex jispjega.
Spina kompla jgħidilna kif f’Malta hawn entużjażmu kbir għat-tlielaq taż-żwiemel u dan kompla ħeġġeġ lit-tim organizzattiv sabiex iġib l-avveniment f’Malta.
L-Awtorità Maltija għat-Turiżmu qiegħda torganizza bis-sħab dan l-avveniment bl-għan li tattira lejn Malta turiżmu sportiv filwaqt li twessa’ l-portofol turistiku sabiex tattira lejn Malta turiżmu ta’ aktar kwalità.
Jonathan Pace, mill-kumpanija Maltija NRGY Concepts Ltd, li qegħdin jikkordinaw dan l-avveniment lokali, spjegalna l-isfidi li kellhom jaffaċċjaw biex f’pajjiżna jiġi organizzat avveniment ta’ dan il-kalibru u fuq livell internazzjonali.
“L-ewwel u qabel kollox, f’Malta għandna nuqqas ta’ faċilitajiet. L-ikbar sfida tagħna kienet li nibnu arena ta’ 60m x 35m għal ġimagħtejn biss, dan apparti l-installazzjoni ta’ 200 stalla, spazju fejn jinħaslu ż-żwiemel, spazju fejn jintrefa’ u jitqassam l-ikel tal-bejjhem u spazji tekniċi, fost l-oħrajn. Ħafna minn dawn il-faċilitajiet kellhom jiġu importati minn barra għaliex ovjament f’Malta ma issibx. Madanakollu t-tim daħal għall-isfida u hawn aħna, MFCC kif qatt ma rajtuh qabel, b’aktar minn 1200 tunnellata ramel, li qiegħed jifforma l-akbar arena tat-tiġrijiet taż-żwiemel imsaqfa f’Malta”, kompla jispjega.
Mis-Sibt li għadda bdew jaslu Malta żwiemel minn madwar l-Ewropa fosthom mill-Italja, Franza, ir-Repubblika Ċeka, is-Slovakkja, l-Ungerija u l-Belġjum. Din ukoll kienet uġigħ ta’ ras, iżda bis-support tal-dipartiment tal-veterinarji dan il-proċess mexa tajjeb ħafna.
Waqt li konna f’MFCC, Spina spjegalna kif dawn it-tip ta’ tiġrijiet jaħdmu u l-popolarità tagħhom li dejjem tiżdied madwar id-dinja. L-isport huwa l-aktar popolari fl-Amerika, f’Texas, iżda qiegħed jikseb popolarità kbira fl-Ewropa, l-aktar fl-Italja, Franza, is-Slovakkja u r-Repubblika Ċeka.
Golden Buckle hija meqjusa bħala waħda mill-kompetizzjonijiet ta’ stima u li kull ma’ jmur qed tikber. Il-kompetizzjoni hija mfassla biex toffri mhux biss pjattaforma tat-tiġrijiet iżda esperjenza ta’ wirja professjonali li tivvjaġġa minn kontinent għall-ieħor, b’ġerrejja ta’ kwalità u b’abilitajiet kbar madwar id-dinja. Wara suċċess sinifikanti fl-Italja, l-edizzjoni ta’ Malta dalwaqt se tkun segwita mill-avveniment ewlieni ta’ Golden Buckle f’Jannar f’Waco, Dallas. Il-kompetizzjoni mistennija tara ‘l fuq minn 700 żiemel jikkompetu għat-titlu internazzjonali.
Luigi spjega li din il-ġimgħa wħud miċ-champions tad-dinja mistennija jkunu parti mill-edizzjoni ta’ Malta, fosthom ismijiet bħal Pete Oen; 6X AQHA World Champion, Jordon Briggs; 2021 WPRA World Champion and 2X BFA Champion, Tyler Rivette; AQHA and BFA World Champion and Ashley Schafer; Multiple Futurity Champion.
Jekk int dilettant taż-żwiemel, Golden Buckle huwa l-avveniment li għandek tattendi din il-ġimgħa. Matul l-avveniment, wieħed se jsegwi ġerrejja ta’ kull età jikkompetu f’kategoriji differenti. Għalhekk din il-ġimgħa int tista tkun parti minn din l-esperjenza u apparti minn hekk tgawdi minn ikel u divertiment li wieħed jista jsib fil-Malta Fairs & Convention Centre mit-13 sas-16 ta’ Ottubru 13-16 2022
Biljetti u aktar informazzjoni huma disponibbli minn www.goldenbuckle.eu