“L-Ukrajna trid garanzija ta’ sigurtà għal minimu ta’ 20 sena mill-Istati Uniti qabel ma tkun tista’ tiffirma ftehim ta’ paċi b’dinjità,” qal il-President Ukren Volodymyr Zelensky qabel taħditiet mar-Russja u mal-Istati Uniti li huma skedati li jsiru fil-jiem li ġejjin.
Meta kien qed jitkellem f’Munich is-Sibt li għadda, Zelensky talab ukoll għal data ċara biex l-Ukrajna titħalla tissieħeb fl-Unjoni Ewropea. Xi uffiċjali tal-Unjoni Ewropea indikaw li d-data tista’ tkun kmieni sal-2027.
Meta indirizza s-summit annwali tas-sigurtà, il-President tal-Ukrajna qal li jittama li “l-laqgħat trilaterali ta’ din il-ġimgħa jkunu serji, sostantivi u ta’ għajnuna għalina lkoll, iżda, onestament, xi drabi jidher li l-partijiet qed jitkellmu dwar affarijiet kompletament differenti”.
“Huwa spiss li l-Amerikani jerġgħu lura għas-suġġett tal-konċessjonijiet u wisq drabi dawk il-konċessjonijiet jiġu diskussi biss fil-kuntest tal-Ukrajna, mhux tar-Russja,” huwa żied jgħid.
F’konferenza tal-aħbarijiet fi Munich, Zelensky qal li kien infurmat mill-Istati Uniti li jekk l-Ukrajna tirtira minn Donbas, il-paċi tintlaħaq kemm jista’ jkun malajr, iżda insista li din il-konċessjoni mhijiex possibbli peress li hemm Ukreni jgħixu hemm.
Huwa żvela wkoll li s’issa l-Istati Uniti offrew garanzija ta’ sigurtà ta’ 15-il sena, iżda l-Ukrajna qiegħda tinsisti fuq minimu ta’ 20 sena, ftehim legalment sod u ċar li jistipula l-għajnuna speċifika li l-Istati Uniti jipprovdu lil forza Ewropea ta’ riassigurazzjoni ppjanata li tiddaħħal fl-Ukrajna f’każ li jintlaħaq ftehim ta’ paċi.