Minkejja li fl-aħħar sigħat l-Uragan Ian naqqas mis-saħħa formidabbli tiegħu, dan xorta waħda kompla juri l-qilla tiegħu ġewwa Florida hekk kif dan kompla jolqot il-Gulf Coast ta’ Florida b’xita torrenzjali u riħ qawwi.
Ian laqat b’qilla kbira lil Florida nhar l-Erbgħa waranofsinhar bħala uragan ta’ Kategorija 4, u dan ġab miegħu riħ ta’ 150 mil fis-siegħa li ħalla devastazzjoni kull fejn laqat. L-Uragan Ian qiegħed ikun meqjus bħala waħda mill-iktar maltempati qalila li laqtu lill-Istati Uniti f’dawn l-aħħar snin.
Fortunatament issa dan beda jnaqqas mis-saħħa tiegħu u f’temp ta’ tmien sigħat minn meta ħakem dan niżel għal uragan ta’ Kategorija 1 b’riħ ta’ 90 mil fis-siegħa.
Li qiegħed jiġri iżda hu li dan l-uragan qed jimxi bil-mod ħafna u bl-ammont ta’ xita kkawżata qiegħda tkompli tikber il-biża’ ta’ għargħar.
S’issa fortunatament ma kien hemm l-ebda rapporti ta’ nies li mietu jew sofrew ġrieħi f’dan il-maltemp.
