L-Urugwaj rebħu t-Tazza tad-Dinja Under/20 li saret fl-Arġentina meta tard il-Ħadd li għadda għelbu lill-Italja 1-0 b’goal tard fil-partita li ġie skorjat minn Luciano Rodriguez fis-86 minuta
Rodriguez kien qed jirritorna minn sospensjoni ta’ żewġ logħbiet wara li tkeċċa kontra Gambja biex rebbaħ it-tazza lit-team tiegħu b’mod drammatiku.
Inkoraġġuti mill-partitarji numerużi tagħhom l-Urugwaj kienu rebbieħa mistħoqqa f’La Plata. Anderson Duarte kellu l-aħjar ċans fl-ewwel taqsima, iżda d-daqqa ta’ ras soda u mill-viċin tiegħu ġiet akrobatikament salvata minn Sebastiano Desplanches.
Kien hemm drama fil-81 minuta. Matteo Prati kompla għoli fuq Fabricio Diaz, u r-referee Glenn Nyberg urih il-karta l-ħamra. Wara reviżjoni tal-VAR, huwa bidilha għal safra, u żamm bilanċ numeriku.
Il-players Urugwajani ħassewhom aggravati, iżda rnexxielhom ipoġġuh f’moħħhom u sabu dak il-goal elussiv. Alan Matturro għamel b’mod brillanti biex żamm il-ballun f’kaxxa konġestjonata, u meta wasal għand Rodriguez, ftit metri barra, tefa’ fix-xibka bir-ras.
Fil-partita għat-tielet post żewġ goals mill-aqwa poġġew marka ta’ esklamazzjoni fuq tournament ta’ debutt indimentikabbli għall-Iżrael li għelbu lill-Korea t’Isfel 3-1.
Il-goals tagħhom ġew minn Ran Binyamin (19), Omer Senior (76) u Anan Khalaili (85) waqt li Seung-won Lee (24) kien kiseb id-draw momentarju għall-Koreani.
