Orthodox Wizards rebħu l’Equipe Summer League għal dan is-sajf 2022 wara li f’finali verament missielta għelbu liċ-champions renjanti Leġġendarji AFC 6-5 wara l-għoti tal-penalties.
Kienet logħba ferm sabiħa b’Orthodox li dejjem kienu fil-vantaġġ iżda b’Leġġendarji li dejjem għarfu jġibu l-iskor indaqs. Fl-aħħar mill-aħħar kellha tkun il-lotterija tal-penalties li tiddeċiedi x-xorti ta’ din il-logħba.
Jovan Kostic spikka għal Orthodox Wizards hekk kif skorja hat-trick b’Dusan Petrovic iżid ieħor għat-tim tiegħu.
Tareq Al Makki skorja doppjetta filwaqt li Nathan Caruana u Zvezdan Vukovic żammew it-tamiet ta’ Leġġendarji ħajjin.
Bl-iskor 4-4, il-logħba marret għall-penalties b’Orthodox li kienu aktar preċiżi meta skorja tnejn mit-tliet xuttijiet li taw filwaqt li Leġġendarji fallew żewġ tentattivi.
Spurs rebħu l-Meridian Cup wara li għelbu lil Masters R United 5-3 wara l-għoti tal-penalties.
Kienet logħba oħra missielta bi Spurs li stabilixxew vantaġġ ta’ 3-1 iżda b’Masters R United li rnexxielhom jilħqu lill-avversarji tagħhom wara reazzjoni furjuża. Anke hawn kienu Spurs li kisbu s-suċċess mixtieq wara l-għoti tal-penalties meta huma skorjaw iż-żewġ penalties li taw filwaqt li Masters R United ma rnexxielhom jegħlbu lill-gowlkiper avversarju.
Sadanittant fil-ħin regolamentari Aeammar Emad skorja doppjetta għal Spurs b’Keith Grech iżid ieħor. Masters R United wettqu r-reazzjoni tagħhom grazzi għall-gowls ta’ Charlo Debattista li skorja doppjetta u Chris Muscat Role.
Finalment, Flutter kisbu suċċess fid-Decathlon Cup wara li għelbu lil Pentasia 4-3, f’partita ferm emozzjonanti.
Il-logħba kienet waħda ferm bilanċjata iżda fl-aħħar mill-aħħar kienu Flutter li ħarġu bir-riżultat mixtieq u bir-rebħ tat-tazza.
Clyde Bouvet ispira lit-tim tiegħu għas-suċċess finali meta skorja tliet gowls filwaqt li Danilo Toro ukoll niżżel ismu fost l-iskorers.
Neil Sammut żamm lil Pentasia fil-logħba meta skorja hat-trick.