Minn Cristian Muscat
Kif bdiet l-imħabba tiegħek lejn iċ-ċikliżmu?
Minn dejjem kont inħobb noħroġ bir-rota – meta kont tifel/żagħżugħ kont kuljum fuq il-BMX tiegħi, għalkemm qatt ma kont involut fi tlielaq jew kompetizzjonijiet. Iżda l-imħabba vera għaċ-ċikliżmu bdiet aktar tard, meta xtrajt l-ewwel roadbike fit 2019. Waqt il-lockdown bdejt namel izjed training u nara titjib fil-fitness tiegħi, u hekk beda jinteressani l-aspett kompetittiv. Meta reġgħu bdew it-tlielaq wara r-restrizzjonijiet, iddeċidejt li nipprova intelaq – u minn hemm ma ħaristx lura
X’tikkummenta fuq l-aħħar suċċess waqt l-aħħar edizzjoni tat-Tour ta’ Malta?
Li nirbaħ it-Tour ta’ Malta din is-sena kienet esperjenza inkredibbli għalija. Is-sena li għaddiet spiċċajt fit-tieni post, u din ix-xitwa ħdimt aktar minn qatt qabel. Hu sabiħ ħafna meta tara l-isforz kollu jagħti frott. Din ir-rebha se nibqa niftakara għal dejjem.
X’suċċessi maġġuri oħra ksibt fil-karriera tiegħek sa issa f’dan l-isport li tant tħobb?
Matul dawn l-aħħar ftit snin kelli diversi rebħiet u podiums li kollha għandhom post speċjali għalija. Imma apparti mir-rebħa fit-Tour ta’ Malta, wieħed mis-suċċessi li jiena l-iktar kburi bih hu t-tieni post f’tellieqa National B fir-Renju Unit – li hu t-tieni l-ogħla livell ta’ tellieqa nazzjonali.
Kif tqis il-livell taċ-ċikliżmu f’pajjiżna fil-preżent?
Minn meta bdejt intelaq f’Malta tliet snin ilu, li l-livell żdied sena wara sena – u dan hu sabiħ ħafna li tara. Hemm numru ta’ ċiklisti li dedicati, qed jitħarrġu b’mod izjed serju u qed jagħtu kas tal-fitness tagħhom. Dan joħloq ambjent aktar kompetittiv u jgħin lil kulħadd jaspira għal aktar.
U dak tar-riżorsi fejn titħarrġu u jkollkom il-kompetizzjonijiet tagħkom?
It-taħriġ għar-‘road racing’, ħafna minnu jsir f’toroq miftuħa, li f’Malta huma spiss mimlijin traffiku – u dan joħloq sfidi u perikli. Jiena ngħix fl-Ingilterra, u għalkemm it-toroq hawnhekk mhumiex perfetti, huma ftit aktar kwieti minn Malta. Il-problema ewlenija alija hawnhekk hija ix xita u kesha. F’dak li għandu x’jaqsam mal-kompetizzjonijiet, bħal ħafna affarijiet oħra f’gżira żgħira, l-għażla hi limitata. Ħafna ċiklisti li jixtiequ jkomplu jitjiebu jkollhom ifittxu esperjenzi u tlielaq barra minn Malta.
Kif qed tħares lejn il-futur tiegħek f’dan l-isport?
Billi bdejt nipprattika ċ-ċikliżmu pjuttost tard u issa għandi 33 sena, naf li ma nistax nibni karriera professjonali f’dan l-isport. Għalhekk l-għan tiegħi u li nieħu gost, u sakemm nibqa’ nħoss pjaċir fit-taħriġ u fit-tiġrijiet, ser inkompli nagħmel dan bl-entużjażmu kollu. Xewqa waħda li għadni nżomm hi li xi darba nirrapreżenta lil Malta f’xi avvenimenti internazzjonali – dik tkun kisba kbira għalija personali.
Għaddi messaġġ finali lil min jixtieq jibda jipprattika ċ-ċikliżmu.
L-ewwel ħaġa li għandek tagħmel hi li tissieħeb f’tim lokali fejn tista’ titgħallem minn ċiklisti aktar esperjenzati. Ovvjament, għandek bżonn rota, imma din m’ għandhiex għalfejn tkun xi ħaġa speċjali!
