Minn Cristian Muscat
Kif bdiet l-imħabba tiegħek lejn il-futbol?
Minn etá żgħira ħafna. L-ewwel memorji tiegħi jinkludu dawk fejn kont nilgħab il-futbol meta kelli biss erba’ snin fit-triq fejn trabbejt ġewwa s-Swieqi u minn etá żgħira kont nara l-futbol fuq it-televixin ma’ missieri.
Iddeskrivi r-rwol tiegħek bħala ‘Head of Junior Phase’ u ‘Under 9 Lead Coach’ fi ħdan l-Akkademja ta’ Pietà Hotspurs FC.
Din hija s-seba’ sena tiegħi mal-Pietá. Dis-sena l-klabb investa ħafna fl-istruttura tal-kowċing. Dan jinkludi head coaching team fejn kulħadd għandu “area of focus” bħala etajiet. Jiena se nkun qed nieħu ħsieb l-U8 u l-U9. Ir-rwol jirrikjedi li noffri sapport lill-kowċis tal-U8 u U9 tagħna, u naċċerta li l-prinċipji u l-pjan ta’ taħriġ kif miftiehem mal-Head of Youth Academy, Andrea Vella Grech jitwettqu.
Huwa fatt magħruf li t-tim tal-kbar ta’ Pietà Hotspurs FC qed jutilizza numru ta’ plejers prodotti tan-Nursery. X’taħseb li huwa s-sigriet rigward dan is-suċċess?
Għandek raġun! Il-Pietá jutilizza ħafna prodotti tan-Nursery mat-tim tal-kbar. Apparti li huwa ta’ sodisfazzjon kbir għal min jaħdem fin-Nursery li tara ħaġa hekk isseħħ, hija wkoll strateġija sostenibbli fit-tul għall-klabb għax dejjem aħjar li fejn possibbli ttella’ tfal minn tiegħek milli tonfoq il-flus biex tixtri l-plejers. Biex dan iseħħ, irid ikun hemm kowċis tal-kbar li jemmnu f’din l-istrateġija u jagħtu kunfidenza lil dawn il-plejers żgħar. Il-klabb dejjem irnexxielu li jkollu kowċis tat-tim tal-kbar li jħaddnu dawn il-valuri.
Kif tqis il-livell tal-grassroots f’pajjiżna?
Il-livell tjieb fejn snin ilu. Illum hemm iżjed kowċis ikkwalifikati, faċilitajiet aħjar eċċ. Għad hemm fejn wieħed jitjieb. Pereżempju, nara li għad hemm wisq iffukar fuq ir-riżultat u tara wisq tfal fit-timijiet kompetittivi (U15 u U17) li jibżgħu jesprimu ruħhom waqt il-logħba. Irridu nagħtuhom iżjed kunfidenza biex jilagħbu bil-ballun u mhux jeħilsu minnu malajr biex ma jagħmlux żball.
U dak tal-futbol Malti fil-preżent, u kif rajtu jinbidel tul is-snin?
Il-livell tjieb ukoll. Naħseb ikun terga’ aħjar, li kieku jkun hemm iżjed plejers Maltin jilagħbu fil-Malta Premier u forsi ftit iżjed plejers Maltin jesperjenzaw li jilagħbu l-futbol barra minn xtutna.
U dak tar-riżorsi (grawnds) fejn il-plejers jitħarrgu u jilagħbu l-logħob kompetittiv tagħhom?
Illum hemm ħafna iżjed grawnds milli kien hemm fil-passat. Għad hemm klabbs li t-timijiet tagħhom 11-a-side m’għandhomx fejn jużaw grawnds ta’ dak id-daqs b’mod regolari. Hemm limitu ta’ spazju fil-pajjiż, allura għandu jsir iżjed minn dak li qed isir bħalissa, pereżempju li l-klabbs ikollhom arranġamenti ma’ skejjel eċċ. biex jużaw dawk il-grawnds fil-ħinijiet ta’ wara l-iskola.
Kif qed tħares lejn il-futur tiegħek fil-futbol?
Jiena kuntent ħafna nikkowċja l-Pietá u fl-etajiet li qed nikkowċja (U8 u U9). It-tfal huma l-ikbar raġuni għaliex jiena kuntent. Li tarahom jieħdu gost jesprimu ruħhom waqt il-logħob, hija ħaġa ta’ sodisfazzjon kbir. Xi darba fil-futur, meta l-ħajja tax-xogħol u personali jippermettu, nixtieq nipprova nikkowċja etajiet ikbar, imma jekk dik ma sseħħx jiena kuntent ħafna b’li qed nagħmel.
Għaddi messaġġ finali lil min jixtieq jagħmel karriera ta’ suċċess fil-futbol.
Taqtax qalbek, ibqa’ dedikat f’dak li qed tagħmel u ftakar li fil-ħajja qatt ma nieqfu nitgħallmu. Dawn il-prinċipji għandhom jgħinu lil kulħadd jasal fejn għandu jasal. Il-fortuna tgħin ukoll u trid tkun lest taħtaf l-okkażjoni jekk u meta tiġik!