Minn Cristian Muscat
Kif bdiet l-imħabba tiegħek għall-futbol?
L-imħabba tiegħi għall-futbol bdiet meta kont żgħir ħafna, l-ewwel id-dar fejn tibda bl-ewwel ballun tiegħek bħala rigal u mbagħad tibda tilgħab fil-klabb fil-belt tiegħek. Bdejt nilgħab minn seba’ snin sakemm kelli 13-il sena fil-belt tiegħi u mbagħad, peressli tant kont inħobb il-futbol, iddeċidejt li nagħmel prova ma’ Arsenal Football Club, klabb fil-belt ta’ Buenos Aires, u hekk beda l-vjaġġ tiegħi fil-futbol.
Kif ġejt tilgħab f’Malta mill-Arġentina?
Ġejt Malta permezz ta’ sieħbi Claudio Frances. Kont lgħabt miegħu fl-Arġentina. Meta wasal f’Xewkija, il-president u l-kowċ ta’ dak iż-żmien qalulu li kienu qed ifittxu attakkant. Tawni l-permess, u hekk spiċċajt hawn Malta.
Ħa mmur dritt għall-punt. X’inhuma l-kummenti tiegħek dwar il-fatt li kont l-aqwa skorer Arġentin fid-dinja fl-2025?
Ninsab tassew kuntent, għax taħdem u tistinka bis-sħiħ kuljum biex dawn l-affarijiet iseħħu, u li tkun wieħed mill-aqwa skorers tal-2025 hija xi ħaġa li tagħmilni kburi u timmotivani biex dejjem nistinka għal aktar.
Iddeskrivi l-esperjenza preżenti tiegħek ma’ Xewkija Tigers FC.
L-esperjenza tiegħi ma’ Xewkija Tigers FC hija waħda tajba ħafna, anke jekk għadna ma rnexxilniex nikkurunawha bi trofew jew kampjonat. Tassew għenitni nikber ħafna bħala plejer u bħala persuna, u biex inkompli nitgħallem maż-żmien. Jien ukoll fortunat li għandi sħabi tat-tim mill-aqwa li għenuni ħafna bl-adattament tiegħi għall-klabb u bil-lingwa, peressli wasalt hawn malta mingħajr ma kont naf xejn bl-Ingliż!
X’tista’ tgħid dwar il-prestazzjonijiet u r-riżultati miksuba minnkom matul dan l-istaġun s’issa?
Rigward il-prestazzjonijiet tiegħi, nista’ ngħid li huma taħlita ta’ xogħol iebes u sagrifiċċju kostanti, dejjem nagħti l-aħjar tiegħi għalija nnifsi u għal sħabi tat-tim. Naf ukoll li minkejja li kelli żmien tajjeb ta’ forma u stajt niskorja gowls fil-biċċa l-kbira tal-logħbiet, dan huwa wkoll grazzi għal sħabi tat-tim; huma dawk li jgħinuni noħloq opportunitajiet biex niskorja gowls u nikkontribwixxi mill-pożizzjoni tiegħi.
X’tista’ tgħid dwar il-kowċis Jesmond Zammit u Vince Carbonaro?
Rigward il-kowċis Jesmond Zammit u Vince Carbonaro, aħna tassew grati lejhom. Minn meta ngħaqdu magħna, dejjem kienu inkredibilment ġentili u taw kollox għall-klabb, kif ukoll għal kull plejer fit-tim. Għax lil hinn mill-futbol, huma nies mill-isbaħ, u aħna dejjem grati lejhom.
U dwar il-kumitat immexxi mill-president Jeffrey Farrugia?
Aħna grati wkoll lejn il-kumitat u l-president, Jefrey Farrugia, għax huma dejjem disponibbli għalina, jippruvaw jgħinu u jikkontribwixxu mill-pożizzjonijiet rispettivi tagħhom, dejjem jistinkaw biex ix-Xewkija tikber f’kull kuntest.
Kif tqis il-livell attwali tal-futbol Għawdxi?
Naħseb li l-futbol Għawdxi jinsab f’livell tajjeb, imma nemmen ukoll li jista’ jikber ħafna aktar u jsir ħafna aktar kompetittiv milli hu issa.
U xi ngħidu dwar ir-riżorsi (il-grawnds) fejn titħarrġu u jkollkom il-kompetizzjonijiet uffiċjali tagħkom?
Rigward il-grawnds tat-taħriġ, għalkemm mhumiex ideali f’xi każijiet, dawn huma affarijiet li jistgħu jittejbu biex jiġu evitati ħafna korrimenti komuni tal-plejers ikkawżati minn taħriġ fuq uċuħ iebsin ħafna. Il-Gozo Stadium huwa sempliċiment f’kundizzjoni eċċellenti għal kull partita; tista’ tara li jagħmlu ħafna sforz biex iżommuh hekk matul l-istaġun kollu.
Kif tqis il-mentalità rigward l-isport f’pajjiżna fil-preżent?
Il-mentalità rigward l-isport f’Malta u Għawdex tidher pożittiva għalija; hemm interess notevoli fit-tkabbir tal-isport, kif inhu l-każ fil-futbol. Ta’ min jinnota li fil-futbol modern, il-mentalità u d-dixxiplina huma pilastri fundamentali biex jintlaħaq l-ogħla livell.
Kif qed tħares lejn il-futur tiegħek fil-futbol?
Dwar il-futur tiegħi fil-futbol, bħalissa jien iffukat fuq li nagħti kollox ma’ Xewkija u ngawdi l-preżent, imma dejjem naħseb biex inkompli naħdem biex nibqa’ nikber u nilħaq l-ogħla livell.
Għaddi messaġġ finali lil dawk li jixtiequ jagħmlu karriera ta’ suċċess fil-futbol.
Il-messaġġ li rrid ngħaddi lil kull min jixtieq jibda l-karriera tiegħu fil-futbol huwa li jagħti kollox, qatt ma jieqaf jipprova. Dawk li jissagrifikaw u jistinkaw eventwalment se jiġu ppremjati.
Jista’ jkollok żminijiet tajbin u ħżiena, imma l-importanti hu li tippersisti u tibqa’ taħdem!
