Il-LifeCycle Malta Foundation ippreżentat il-kontribut annwali tagħha lill-Fond tar-Riċerka tal-Universita’ ta’ Malta (RIDT) biex tappoġġja r-riċerka li għaddejja dwar il-mard tal-kliewi. Din id-donazzjoni ta’ €25,000, parti mis-somma li nġabret fil-LifeCycle Challenge 2024, wasslet biex il-kontribuzzjonijiet totali tal-Fondazzjoni lill-RIDT mill-2014 telgħu għal €295,000.
Il-fondi ġew ippreżentati formalment minn Alan Curry, fundatur u Chairman ta’ LifeCycle Malta, lil Prof. Alfred J. Vella, Rettur tal-Universita’ ta’ Malta u Chairperson tal-RIDT. Għall-preżentazzjoni attendew ukoll Prof. Simon Fabri, Pro-Rettur għar-Riċerka; Wilfred Kenely, CEO tal-RIDT; Dr Christian Zammit, Kap tad-Dipartiment tal-Anatomija; u r-riċerkaturi involuti f’dan l-istudju.
Il-finanzjament ta’ din is-sena se jappoġġa primarjament ir-riċerka fil-ġenetika tal-autosomal dominant polycystic kidney disease (ADPKD), l-aktar kundizzjoni ġenetika tal-kliewi komuni f’Malta. Immexxija mill-Prof. Edith Said u mill-Prof. Emanuel Farrugia, din ir-riċerka identifikat genetic markers uniċi li huma kruċjali għad-dijanjosi bikrija u l-valutazzjoni tar-riskju tal-mard tal-kliewi, u li se tinfluwenza l-prattiki mediċi lokali malli jiġi stabbilit il-profil dijanjostiku ġenetiku għall-popolazzjoni lokali.
Il-LifeCycle Malta Foundation kienet kruċjali fl-espansjoni tal-Programm ta’ Riċerka tal-Kliewi, li ġie varat permezz ta’ donazzjoni ta’ €70,000 mill-Fondazzjoni fl-2014. Kisbiet sinifikanti jinkludu l-biobank tal-mard tal-kliewi u studji kritiċi dwar il-mard konġenitali tal-kliewi u d-diabetic nephropathy.
Il-LifeCycle Challenge 2024, l-avveniment ewlieni għall-ġbir ta’ fondi mill-Fondazzjoni, kien jikkonsisti fi vjaġġ bir-roti ta’ 2,000 kilometru mill-Botswana sal-Cape of Good Hope. Fl-2025, it-tim se jkun qed jagħmel maratona bir-roti fil-Ġordan u l-Għarabja Sawdija, minn Petra sa Jeddah.
Sa mill-bidu tagħha fl-1999, il-Fondazzjoni ġabret kważi €4 miljun. Minbarra r-riċerka, il-LifeCycle Malta Foundation tappoġġja servizzi essenzjali għall-pazjenti b’mard tal-kliewi. Dawn jinkludu t-TRACCIA Software Support System għat-tqabbil ta’ donaturi u riċevituri tal-kliewi, couches għad-dijalisi, vann għat-trasport tal-pazjenti, il-pellegrinaġġ annwali f’Lourdes għall-pazjenti tal-kliewi, u l-inizjattiva RUSH – hub ta’ appoġġ għall-pazjenti bil-mard tal-kliewi f’Malta.
Il-LifeCycle Challenge 2024 kien appoġġat minn Nescafé bħala l-isponsor prinċipali, flimkien ma’ Hili Ventures, Smart Technologies Limited, Laferla, JPA, GasanMamo Insurance, APS Bank, Agora Estates plc, Valletta Waterfront, Crane Currency, u oħrajn.
Għal iktar informazzjoni wieħed jista’ jżur: https://lifecyclefoundation.com jew https://www.facebook.com/LifeCycleChallenge
