Lionel Messi u l-Arġentina tiegħu rebbieħa tat-Tazza tad-Dinja skurjaw doppjetta billi ġew imsemmija Sportiv u Team tas-Sena fil-Laureus World Sports Awards.
Messi, li huwa l-captain tal-Arġentina, skorja seba’ darbiet u rebaħ il-Ballun tad-Deheb hekk kif pajjiżu rebaħ it-Tazza tad-Dinja 2022 fil-Qatar f’Diċembru li għadda. B’hekk huwa sar l-ewwel atleta li rebaħ it-team u l-premjijiet individwali fl-istess sena.
L-Isportiva tas-Sena marret għand l-isprinter Ġamajkana, Shelly-Ann Fraser-Pryce. Hija rebħet it-titlu mondjali tan-nisa tal-100 metru fil-Kampjonati tad-Dinja tal-Atletika f’Oregon f’Lulju, u saret l-ewwel persuna li rebħet ħames midalji tad-deheb f’avveniment individwali fil-kampjonati.
“Dan huwa unur speċjali,” qal l-attakkant ta’ Paris St-Germain, Messi, ta’ 35 sena. “B’mod partikolari peress li l-Laureus World Sports Awards huma f’Pariġi din is-sena, il-belt li laqgħet lill-familja tiegħi minn meta ġejna hawn fl-2021.
“Irrid nirringrazzja lill-sħabi kollha, mhux biss tat-team nazzjonali, iżda wkoll lil PSG – ma ksibt xejn minn dan waħdi u jien grat li stajt naqsam kollox magħhom.”
Id-deheb tal-100 metru ta’ Fraser-Pryce waslet 13-il sena wara l-ewwel tagħha u l-atleta ta’ 36 sena għandha aktar titli mondjali ta’ sprints minn kull atleta oħra.
Hija ġriet il-100 metru taħt l-10.7 sekondi seba’ darbiet fl-2022, tlieta aktar mill-aħjar preċedenti għal sprinter mara f’sena kalendarja.
“Kont ferħana li ġejt nominata flimkien ma’ atleti nisa li jispiraw bħal dawn, u li tirbaħ dan il-premju, ivvutat għalih minn uħud mill-akbar sportivi ta’ kull żmien, hija xi ħaġa tal-għaġeb,” hija qalet.
“Din hija s-sitt darba li ġejt nominata f’din il-kategorija, għalhekk li fl-aħħar qed inżomm f’idi l-istatwetta Laureus huwa wieħed mill-akbar unuri tal-karriera tiegħi.”
L-Arġentina rebħet it-Tazza tad-Dinja għat-tielet darba, meta għelbet lil Franza f’penalty shoot-out f’Doha wara possibbilment l-akbar finali ta’ kull żmien, li spiċċat fi draw ta’ 3-3.
Huma għelbu lil Lionesses tal-Ingilterra, rebbieħa tal-Euro 2022, ir-rebbieħa taċ-Champions League, Real Madrid, u ċ-champions tas-Six Nations tar-rugby ta’ Franza biex rebħu l-premju.
Il-midfielder ta’ Manchester United u d-Danimarka, Christian Eriksen, rebaħ ir-Rimonta tas-Sena wara li rritorna fil-football wara li waqa’ fil-ground minħabba arrest kardijaku waqt l-Euro 2020, filwaqt li l-player fin-numru tnejn tad-dinja tat-tennis, Carlos Alcaraz, ingħata l-Observa Mondjali tas-Sena wara l-2022 li fiha iż-żagħżugħ ta’ dak iż-żmien ta’ 19-il sena rebaħ il-US Open u sar l-iżgħar numru wieħed tal-irġiel tat-tennis.
Ir-rebbieħa tal-premjijiet ġew ivvutati minn għażla ta’ sportivi kbar li huma membri tal-Akkademja Laureus.
IL-LISTA KOLLHA TAR-REBBIEĦA
Premju Laureus Sportiv tas-Sena tad-Dinja: Lionel Messi
Premju Laureus Sportiva tas-Sena tad-Dinja: Shelly-Ann Fraser-Pryce
Premju Laureus Team tas-Sena tad-Dinja: Team tal-Football tal-Irġiel tal-Arġentina
Premju Laureus Avvanz tas-Sena tad-Dinja: Carlos Alcaraz
Premju Laureus Rimonta tas-Sena tad-Dinja: Christian Eriksen
Premju Laureus Sportiv/a tas-Sena b’Diżabbiltà tad-Dinja: Catherine Debrunner
Premju Laureus Sportiv tas-Sena tal-Azzjoni tad-Dinja: Eileen Gu
Premju Laureus Sport for Good: TeamUp (Programm għat-tfal spostati mill-gwerra mill-attakkant ta’ Barcelona u tal-Polonja, Robert Lewandowski)
