Liverpool qablu fuq ftehim ta’ £18-il miljun ma’ Brentford biex ibigħu lill-goalkeeper Caoimhin Kelleher.
L-internazzjonali tar-Repubblika tal-Irlanda se jieħu post Mark Flekken li se jingħaqad ma’ Bayer Leverkusen għal £9 miljun.
Kelleher, ta’ 26 sena, kien fadallu biss sena waħda fuq il-kuntratt tiegħu u Liverpool kienu qed jitolbu madwar £20 miljun għal dan il-goalkeeper.
Kelleher kellu wkoll interess minn West Ham, Leeds u Bournemouth.
Brentford ilhom interessati f’dan il-goalkeeper minn qabel ma ffirmaw lil Flekken iżda Liverpool kienu miftuħa għall-bejgħ biss minn meta assiguraw l-akkwist ta’ Giorgi Mamardashvili mingħand Valencia fis-sajf li għadda.
Kelleher irid jikkompeti għall-post mal-ewwel 11 u l-wasla ta’ Mamardashvili tfisser li huwa l-Ġorġjan li se jkun qed jiġġieled għal dan il-post ma’ Alisson fl-istaġun li ġej.
