Liverpool iddeċidew li jittardjaw it-tħabbira tal-wasla ta’ Fabio Carvalho filwaqt li l-winger għadu jiġġieled għat-titlu taċ-Championship ma’ Fulham.
Ġie rrappurtat li ż-żagħżugħ ta’ 19-il sena qabel li jingħaqad mar-Reds b’kuntratt ta’ ħames snin, b’Liverpool iħallsu ħlas bil-quddiem ta’ madwar £4.2m.
Għalkemm dak il-ftehim xorta jidher li se jgħaddi, huwa mifhum li Liverpool qed iżommu lura milli jħabbru l-firma ġdida tagħhom fir-rigward ta’ Fulham, li qed jersqu lejn ir-ritorn fil-Premier League.
It-team immexxi minn Marco Silva għandu vantaġġ ta’ 10 punti fil-quċċata tal-klassifika taċ-Championship fuq AFC Bournamouth, iżda bil-promozzjoni għadha mhix assigurata, Liverpool mhumiex lesti li jfixklu l-affarijiet għall-club mill-Punent ta’ Londra.
Minkejja d-dewmien, il-ftehim tlesta u hija kwistjoni ta’ żmien qabel ma ż-żagħżugħ jiġi żvelat bħala l-aħħar akkwist għat-team immexxi minn Jurgen Klopp.
Carvalho, li skorja seba’ goals fiċ-Championship dan l-istaġun, kien viċin li jingħaqad mar-Reds fil-ġurnata tal-iskadenza f’Jannar, iżda l-ftehim ma seħħx fil-ħin.
