Il-mużew tal-Louvre f’Pariġi, wieħed mill-aktar siti kulturali u turistiċi rinomati u famużi fid-dinja, jinsab f’nofs tensjoni industrijali serja li tista’ twassal għal għeluq temporanju lejn tmiem dan ix-xahar ta’ festi. L-unjins li jirrappreżentaw lill-impjegati tal-mużew sejħu għal strajk b’reazzjoni u ttieħed vot favur għal azzjoni minħabba kundizzjonijiet tax-xogħol dejjem aktar diffiċli u nuqqas ta’ investiment adegwat fis-sigurtà u l-infrastruttura.
Il-ħaddiema, inklużi dawk fis-setturi tas-sigurtà, manutenzjoni u preservazzjoni, spjegaw li l-istress fuq is-servizzi żdied b’mod konsiderevoli filwaqt li problemi strutturali u nuqqas ta’ riżorsi baqgħu mhux indirizzati. L-unjins CGT, CFDT u Sud qalu li l-istituzzjoni qiegħda tiffaċċja riskji operattivi reali li jistgħu jaffettwaw kemm lill-impjegati kif ukoll lill-viżitaturi.
Punt ta’ kontroversja ieħor huwa d-deċiżjoni li jiżdiedu l-prezzijiet tal-biljetti għal viżitaturi li mhumiex ċittadini tal-Unjoni Ewropea. Hawn issemmiet żieda ta’ madwar 45%. L-unjins qegħdin jargumentaw li din il-politika tindika prijorità fuq id-dħul finanzjarju aktar milli fuq kundizzjonijiet tax-xogħol sostenibbli u ġusti.
L-awtoritajiet responsabbli u l-amministrazzjoni tal-mużew ħabbru miżuri ta’ ristrutturar u pjanijiet ta’ investiment iżda l-unjins qegħdin jinsistu li dawn mhumiex biżżejjed. Għaldaqstant, il-possibbiltà ta’ għeluq, anke parzjali, ta’ Louvre qiegħed jiġbed l-attenzjoni ta’ ħafna hekk kif jista’ potenzjalment jikkawża impatt negattiv fuq it-turiżmu u fuq ir-reputazzjoni kulturali ta’ Franza.