Luxol St Andrews Futsal Club dalwaqt se jibdew l-impenji tagħhom fil-Kompetizzjoni tar-Rawnd Prinċipali tal-UEFA Champions League.
Din se tkun l-ewwel darba li r-rappreżentanti Maltin se jospitaw dan l-avveniment minn Path A fi Grupp 3 li jinkludi wkoll iċ-Champions Sloveni Dobovec, ir-rappreżentanti Olandiżi Hovocubo, u ċ-Champions Ewropej renjanti Barçelona (Spanja).
Il-grupp Main Round f’Malta bejn il-25 u t-30 ta’ Ottubru huwa skedat li jittella’ fil-Kumpless Sportiv tal-Università f’Tal-Qroqq.
Dan l-istaġun Luxol diġà rebħu s-Super Cup wara li għelbu lill-Università ta’ Malta f’ rebħa kbira ta’ 11-1, li kien segwit minn esperjenza qasira fil-Polonja għall-kamp ta’ taħriġ, fejn it-tim kellu l-opportunità jiġġenera aktar ħin ta’ logħob, kontra wieħed mill-aqwa timijiet fl-Ewropa.
Minkejja żewġ telfiet f’partiti ta’ ħbiberija bl-iskor ta’ 7-0 u 4-1 kontra ċ-Champions Pollakki Piast Gliwice, dawn il-partiti servew biex jevalwaw il-kwalitajiet, l-istandard u l-kundizzjoni fiżika tat-tim qabel il-partiti li jmiss kontra timijiet aktar ta’ kwalità u fost l-aqwa fl-Ewropa, u li huma kollha lesti biex jipparteċipaw fi żmien qasir fil-Grupp tar-Rawnd Prinċipali tal-UEFA Futsal Champions League f’Malta.
L-amministraturi tal-klabb ta’ Luxol Futsal, Mireille Vella, Joe Aquilina, Mario Vella, Nathaniel Jones, u Jose Da Silva bħalissa qed jaħdmu anke f’termini ta’ organizzazzjoni biex jiżguraw l-ogħla standard possibbli għal dan it-tournament fejn tidħol loġistika. u rekwiżiti oħra, kultant riġidi, tal-UEFA.
Dan se jkun kampjonat tal-futsal mill-aqwa, l-aqwa kompetizzjoni f’livell ta’ klabb li qatt sar f’pajjiżna, meqjus ukoll bħala opportunità għat-Turiżmu Sportiv f’perjodu tranżitorju għal din l-industrija bħal mhuwa l-aħħar ta’ Ottubru.
Dan it-tournament jirrappreżenta wkoll opportunità unika għal Luxol St. Andrews Futsal Club biex jiktbu l-istorja u jsiru l-ewwel tim Malti tal-Futsal li javvanza għall-Elite Round bl-aqwa 16-il tim fl-Ewropa, li tlieta minn erba’ timijiet f’dan il-Grupp 3 li se jinżamm f’ Malta se jkunu qed jiksbu l-kwalifikazzjoni għall-Elite Round li jmiss.
F’Konferenza tal-Aħbarijiet riċenti li fiha tnieda dan l-avveniment, ir-rappreżentanti tal-Luxol emfasizzaw il-fatt li dan it-tournament bla dubju se juri l-ogħla standards f’dak li għandu x’jaqsam mal-Futsal internazzjonali billi se jkunu involuti wkoll iċ-Champions Ewropej renjanti Barcelona.
Dan l-avveniment għall-Media serva wkoll biex jitħabbru akkwisti ġodda għal din il-kompetizzjoni tal-UEFA, fosthom l-eks plejer ta’ Lazio, is-Sloven Dejan Bizjak, u erba’ Brażiljani ġodda, Diece, Rodrigo Fumaca, Victor Dias, u l-goalkeeper Celio Cabral.
Plejers ġodda oħra għall-istaġun huma mis-suq lokali, plejers tal-Futsal homegrown Luke Gatt, Andre Ciancio, Gregory Busuttil, u Ryan Marmara kollha jiffurmaw parti mill-iskwadra b’saħħitha tal-Luxol Futsal għal dan l-istaġun 2022/23.
Ta’ min isemmi wkoll l-attributi tal-kowċ ta’ esperjenza kbira Gabriel Dobre, u plejers stabbiliti fit-tim fosthom Mark Zammit, Stefan Vella, Emil Raducu, Everton Veve, Maicon Da Silva, u Celino Alves, li żgur se jkunu qed joffru lil dan il-grupp ta’ plejers l-aqwa possibbiltà li jiktbu l-istorja u jikkwalifikaw għall-Elite Round ta’ din il-kompetizzjoni ferm importanti.
Il-biljetti se jkopru s-sitt logħbiet kollha u jistgħu jinxtraw permezz ta’ dan il-link – https://tapgo.mt.
Avveniment riċenti fil-midja kien indirizzat ukoll mill-Ministru għat-Turiżmu Clayton Bartolo li qal li, “It-turiżmu sportiv huwa opportunità mill-aqwa biex tippromwovi l-Gżejjer Maltin. L-investiment fl-atleti u l-promozzjoni permezz ta’ Visit Malta huma kruċjali għall-kompetittività tal-istrateġija tagħna li niġġeneraw it-turiżmu matul is-sena”.
Is-Segretarju Permanenti fl-Uffiċċju tal-Ministru għall-Isport Clifton Grima, Matthew Vella, sostna wkoll li l-isport dejjem jagħtik l-opportunità li taħsad dak li tiżra’, u l-isforzi kollha li saru f’dawn l-aħħar snin mil-Luxol huma ta’ ispirazzjoni kbira għal klabbs oħra f’diversi dixxiplini biex ikomplu jkunu ta’ suċċess.
Il-pubbliku Malti huwa mħeġġeġ biex isegwi lil-Luxol St Andrews Futsal Club f’din l-opportunità ta’ darba għal dan it-tragward li jista’ jintlaħaq u l-kwalifika storika f’pajjiżna, biex b’hekk isir l-ewwel klabb Malti li qatt ikkwalifika minn dan ir-Rawnd Prinċipali tal-UEFA Champions League u jingħaqad mal-aqwa 16-il tim Ewropew fir-Rawnd Elite tal-kompetizzjoni.
