National Lottery plc u l-Għaqda Ġurnalisti Sports, bi pjaċir iħabbru li Lydan Debono rebaħ is-sitt unur tal-IZIBET Elite Athlete Award li jkopri x-xhur ta’ Novembru u Diċembru 2024.
Nhar is-Sibt 9 ta’ Novembru, Lydan Debono ġie nkurunat Champion tad-Dinja tal-Blackball meta fil-finali tal-Kampjonati Dinjija tal-Blackball, li kienu qed isiru f’Malta, għeleb lill-Ingliż Dean Shields 10-5.
Bidu iebes għal Debono li tilef l-ewwel żewġ frames mill-aqwa minn 19-il frame. Madanakollu il-plejer Malti ma ħarisx lura u kellu wirja stupenda fejn rebaħ ħames frames konsekuttivi. Għal ftit tal-ħin Shields naqas id-distakk iżda Lydan Debono rebaħ il-ħmistax-il frame deċiżiv.
Franco de Gabriele, Chief Commercial Officer ta’ IZI Group kellu kliem ta’ tifħir dwar il-prestazzjoni straordinarja ta’ Lydan Debono fejn qal, “Is-suċċess dinji ta’ Lydan huwa r-riżultat tad-dedikazzjoni kbira tiegħu. Il-fatt li huwa rebaħ il-Kampjonat tad-Dinja tal-Blackball mhijiex xi ħaġa żgħira u l-ħila tiegħu li jqum għall-okkażjoni minkejja li jkun taħt pressjoni hija xi ħaġa tassew kbira. Aħna bħala IZIBET inħossuna kburin li nissaportjaw u niċċelebraw l-eċċelenza fl-isport Malti u s-suċċess ta’ Lydan ikompli jsaħħaħ il-ħidma ma taqta’ xejn u l-perseveranza sabiex ikollna aktar minn dawn is-suċċessi.”
Min-naħa tiegħu, Clinton Buhagiar, il-President tal-Għaqda Ġurnalisti Sports qal, “Il-qlubija li wera Lydan fil-finali hija xi ħaġa impressjonanti. Lydan ilu jaħdem għal dan is-suċċess b’taħriġ kontinwu matul is-sena kollha u li rebaħ il-Kampjonati tad-Dinja mhijiex ta’ sorpriża għalija. L-isport tal-blackball, aktar ma jmur aktar qed jikber f’pajjiżna u nittama li Lydan ikun wieħed minn dawk li jkomplu jimirħu sew f’din id-dixxiplina.”
Il-għan tal-IZIBET Elite Athlete Award huwa li jirrikonoxxi s-suċċessi miksuba mill-atleti lokali kull xahrejn.
Il-bord tal-għażla huwa magħmul minn ġurnalisti u osservaturi sportivi li se jkunu qed jevalwaw bir-reqqa il-kisbiet tal-atleti matul ix-xhur u jassiguraw li jkun hemm il-korretezza matul il-proċess kollu tal-għażla.
Ir-regolamenti tal-IZIBET Elite Athlete Award jistgħu jinkisbu minn fuq il-website tal-Għaqda Ġurnalisti Sports https://www.maltasportsjournalists.com/izibet-elite-athlete-award/