Fi tmiem il‑parteċipazzjoni tiegħu fil‑Konferenza tal‑Ispeakers u Presidenti tal‑Parlamenti tal‑Commonwealth (CSPOC) li nżammet ġewwa l‑Parlament tal‑Awstralja bejn it‑3 u s‑6 ta’ Jannar 2023, l‑Ispeaker tal‑Parlament Malti Anġlu Farrugia kellu l‑opportunità li jiltaqa’ ma’ diversi membri tal‑komunità Maltija li jinsabu fil‑pajjiż.
Huwa ltaqa’ ma’ dawn il‑Maltin fil‑Kummissjoni Għolja ta’ Malta ġewwa Canberra, kif ukoll fil‑clubs La Valette u Ħamrun ġewwa Sydney. L‑Ispeaker irrangrazzja lil dawn il‑Maltin u l‑għaqdiet rispettivi tagħhom li permezz tal‑ħidma, l‑attivitajiet u l‑interessi tagħhom jibqgħu tant marbutin ma’ Malta.
Dawn il-laqgħat kienu possibbli bil-għajnuna tal-Kummissarju Għoli ta’ Malta ġewwa Canberra Mario Farrugia Borg u l-Konslu Ġenerali ta’ Malta ġewwa Sydney Lawrence Buhagiar.
