Omm tfajla ta’ 16-il sena allegatament maqtula mill-forzi tas-sigurtà waqt protesti fl-Iran tkellmet dwar l-uġigħ tagħha wara l-mewt ta’ bintha.
F’intervista mal-BBC, Nasrin Shakarami tgħid li “ma tistax tinsa” dak li ġara lil bintha Nika. Hija kienet qiegħda titkellem mal-attriċi Zar Amir Ebrahami, li ħarbet mill-Iran fl-2008.
Nasrin ċaħdet ukoll it-talbiet tal-awtoritajiet b’rabta mal-imwiet ta’ dimostranti u qalet “ilkoll nafu li qed jigdbu.”
Nika nqatlet waqt protesti li saru lejn l-aħħar tas-sena li għaddiet u minn dakinhar komplew għaddejjin għalkemm saru ferm inqas intensi minħabba repressjoni mdemmija mill-forzi tas-sigurtà.
L-inkwiet beda wara l-mewt ta’ Mahsa Amini, żagħżugħa li kienet inżammet mill-pulizija fil-kapitali talli allegatament kisret ir-regoli stretti tal-Iran li jirrikjedu li n-nisa jgħattu xagħarhom b’hijab.
Erbat ijiem wara li mietet Masha, Nika ġiet iffilmjata waqt protesta f’Tehran li tat in-nar lill-velu li kienet liebsa f’rasha.
Fl-intervista tagħha ma’ Ebrahimi, Nasrin tgħid: “Nika kienet imħassba dwar l-inġustizzja u d-diskriminazzjoni lejn l-Iranjani. Kienet taħseb ħafna dwarha.
“Kienet estremament avventuruża u bla biża’. Dejjem kont inkwetata dwar kemm kienet kuraġġuża. Dejjem kont nibża’ li jista’ jiġrilha xi ħaġa.”
