Iktar minn 2,000 turist spiċċaw maqbudin fil-belt Ċiniża ta’ Beihai u dan wara li ġie impost lockdown minħabba żieda fil-każi ta’ Covid-19.
L-uffiċjali ġewwa din il-belt ordnaw biex żoni urbani jiġu taħt lockdown, u jsiru testijiet tal-massa fuq 1.9 miljun resident. Iċ-Ċina qiegħda ssegwi politika ta’ “żero Covid” u għalhekk minkejja li n-numri ma tantx huma kbar meta mqabbla ma’ pajjiżi oħrajn, fiċ-Ċina dan xorta waħda qiegħed iwassal għal lockdown.
Il-belt ta’ Beihai hija destinazzjoni turistika u popolari ħafna fir-reġjun ta’ Guangxi. Fi tmiem il-ġimgħa li għaddiet il-gvern tal-lokal qal li dawk it-turisti li ma kellhomx kuntatt ma’ persuni infettati jew li żaru zoni fejn kien hemm xi infezzjonjiet jistgħu jitilqu biss jekk jirriżultaw negattiv.
Dawk li jirriżultaw pożittiv iridu bilfors jibqgħu fil-belt fi kwarantina.
