Swieqi Braves baqgħu jżommu r-rekord perfett fil-kampjonat tat-tieni diviżjoni tal-MAFA meta għelbu lil Valletta Stars 2-0. B’din ir-rebħa l-istudenti Brażiljani baqgħu fl-ewwel post tal-klassifika bi tliet rebħiet minn daqstant logħbiet u b’ammont ta’ 12-il gowl skorjati.
L-ewwel taqsima kienet waħda bilanċjata bi Swieqi li bdew jiddominaw il-pussess iżda b’Valletta li bdew itellgħu kontrattakki perikolużi.
Fit-tieni taqsima Swieqi marru fil-vantaġġ meta kien Bruno Menhez Pinheiro li bi freekick pinġut għeleb lill-gowlkiper Belti.
Valletta bdew iżidu fl-attakki tagħhom fit-tentattiv li jġibu l-iskor indaqs iżda reġgħu kienu Swieiq li skorjaw u ssiġġillaw ir-rebħa permezz ta’ Felix Silva Roberty.
Referee kien Jonathan Balzan.
Żabbar Southsiders irritornaw għar-rebħ wara li għelbu lil Naxxar Victorians 2-0. Iż-Żabbarin kienu ferm tajbin f’din il-partita u ħadu vantaġġ minn mumenti kruċjali fit-tieni taqsima u aċċertaw ruħhom mit-tieni rebħa staġjonali.
Kien Ryan Calleja li poġġihom fil-vantaġġ seba’ minuti mill-bidu tat-tieni taqsima sabiex Luke Cachia ssiġġilla r-rebħa fit-63 minuta.
Referee kien Lorry Sammut.
Anke Balluta Barracudas wettqu l-istess bravura meta b’gowl uniku ta’ Andrew Tortell għelbu lil Gudja Wanderers.
Kienet logħba li Balluta amministraw iżda b’Gudja li ppruvaw iżda fil-ġurnata ma kinux daqshekk fortunati.
Wara skor ta’ 0-0 sa tmiem l-ewwel taqsima, fit-tieni 35 minuta l-Cudas skorjaw il-gowl li tahom it-tliet punti bl-iskorer prolifiku Tortell jegħleb lill-gowlkiper ta’ Gudja.
Referee kien Karl Stefan Galea.
F’partita bilanċjata u li offriet erba’ gowls, Birkirkara St Joseph u Ta’ Ġiorni Wanderers spiċċaw fi dro ta’ 2-2.
Kienet partita ta’ botta u risposta b’Ta’ Ġiorni li jmorru minn fuq u bil-Karkariżi li dawru l-iskor għalkemm fl-aħħar mill-aħħar ġie skorjat il-gowl tad-dro biż-żewġ timijiet li ħadu punt kull wieħed.
Kien Sean Gatt Baldacchino li poġġa lil Ta’ Ġiorni minn fuq b’Tariq Awed Ahmed iġib id-dro għal Birkirkara St Joseph minuta minn tmiem l-ewwel taqsima.
Fit-tieni taqsima, Jean Zarb skorja t-tieni gowl ta’ Birkirkara għalkemm waslet ir-risposta tal-Wanderers li skorjaw il-gowl tad-dro permezz ta’ Thomas Debono.
Referee kien Elaine Bonnici.
Mill-kampjonat tat-tielet diviżjoni, Attard Edex Kings rebħu d-derby kontra Buġibba Club de Swat bl-iskor ta’ 1-0.
F’dan id-derby bejn żewġ timijiet Indjani, il-gowl li ddeċieda l-logħba ġie skorjat minn Rajpahl Singh
KLASSIFIKA – MAFA IT-TIENI DIVIŻJONI
Swieqi Braves 9, Balluta Barracudas, Żabbar Southsiders 6, Birkirkara St Joseph, Ta’ Ġiorni Wanderers 4, Valletta Stars, Naxxar Victorians 3, Gudja Wanderers 0
KLASSIFIKA – MAFA Third Division
Attard Edex Kings 5, Buġibba Club de Swat, Fgura Spartans 4, Gżira U, Għaxaq Wolves 2, Ħamrun Amateurs 0
