Marsa St Michael baqgħu fl-ewwel post tal-klassifika tal-Mochika MAFA L-Ewwel Diviżjoni hekk kif għelbu lil Mqabba Albions 3-2.
Ma kinitx logħba faċli għat-tim immexxi minn Malcolm Tirchett bl-Imqabbin li komplew jikkonfermaw il-progress li qabdu u kienu ferm żvinturati li ma ħarġux b’imqar punt minn dan il-konfront.
Min-naħa tagħhom, il-Marsin ħadu vantaġġ miċ-ċansijiet tagħhom u kkastigaw lill-avversarji fil-mumenti kruċjali tal-logħba.
Kien Shaun Abela li poġġa lil Mqabba minn fuq meta l-gowlkiper fit-tentattiv li jikklerja ħabbat il-ballun miegħu bil-ballun jibqa’ dieħel fix-xibka.
Marsa ġabu d-dro fis-17-il minuta minn penalty ta’ Samuel Dickson u marru fil-vantaġġ għaxar minuti wara permezz ta’ Andy Portelli.
Fit-tieni taqsima, Portelli skorja t-tieni gowl personali tiegħu u t-tielet għal Marsa sakemm Ethan Gordon naqqas il-marġni tal-iskor għall-Imqabbin.
Referee kien Georgji Bitri.
Fil-partitissima ta’ tmiem din il-ġimgħa, Valletta St Pauls u San Ġwann Pro Evolution Academy spiċċaw fi dro ġust ta’ 1-1.
Din kienet logħba li laqqgħet żewġ timijiet li se jkunu kontendenti għat-titlu finali.
San Ġwann marru fil-vantaġġ fit-38 minuta permezz ta’ Louis Swann Vachet li għeleb lil Jianiro Camilleri.
Fit-tieni taqsima, il-Beltin ingħataw penalty li ġie skorjat minn Rogger Patino Villada.
Referee kien Ray Tabone.
Senglea Gunners jinsabu fit-tieni post tal-klassifika, punt taħt il-liders Marsa wara li għelbu liċ-champions San Ġiljan Saints 3-1. Għal dawn tal-aħħar din kienet it-tielet telfa minn erba’ partiti fejn jidher li din is-sena se jsibuha ferm diffiċli li jirrepetu l-bravura tal-istaġun li għadda.
Senglea marru fil-vantaġġ wara kwarta u għalkemm San Ġiljan ġabu l-iskor indaqs fil-bidu tat-tieni taqsima, it-tim mill-Isla baqa’ konċentrat u skorja għal darba darbtejn.
Protagonista għall-Gunners kien Lamin Jaiteh li skorja tripletta b’Conor Murphy iġib id-dro momentarju għall-Ġiljaniżi.
Referee kien Lorry Sammut.
Gowl uniku skorjat minn Jhonathan Hinojiza Mosqueea kien biżżejjed għal Tal-Qroqq Versity Kamelasa sabiex jegħlbu lit-tim tal-qiegħ Żebbuġ Youngsters.
Kienet logħba bejn żewġ timijiet li kienu qed jokkupaw l-aħħar żewġ postijiet fil-klassifika u b’din ir-rebħa t-tim minn Tal-Qroqq qabeż lil San Ġiljan Saints fil-klassifika hekk kif issa għandhom erba’ punti.
Referee kien Reno Galea.
Mill-kampjonat tat-tielet diviżjoni, l-ebda gowl ma ġie skorjat fiż-żewġ partiti li ntlagħbu.
Fl-iktar konfront mistenni, Gżira United SC u Buġibba Club de Swat spiċċaw fi dro ta’ 0-0. Kienet logħba fejn iż-żewġ difiżi rispettivi kienu ferm aħjar mill-attakkanti avversarji u litteralment xejnu kull attakk li ppruvaw.
B’dan id-dro, Gżira qed jaqsmu t-tieni post ma’ Għaxaq Wolves b’sitt punti.
Referee kien CJ Saliba
Min-naħa tagħhom, Għaxaq Wolves ukoll temmew il-konfront tagħhom kontra Fgura Spartans fi dro ta’ mingħajr gowls.
Kien konfront fejn Għaxaq ippruvaw jiddettaw il-logħob iżda sabu lill-Fgurin attenti filwaqt li ppruvaw itellgħu xi kontrattakki.
Fl-aħħar mill-aħħar ħadd ma skorja gowls sabiex iż-żewġ naħat ħadu punt kull wieħed.
Referee kienet Elaine Bonnici.
KLASSIFIKA – MOCHIKA MAFA L-EWWEL DIVIŻJONI
Marsa St Michael 10, Senglea Gunners 9, San Ġwann Pro Evolution Academy, Valletta St Pauls 7, Mqabba Albions 6, Tal-Qroqq Versity Kamelasa 4, San Ġiljan Saint 3, Żebbuġ Youngsters 0
KLASSIFIKA – MAFA IT-TIELET DIVIŻJONI
Attard Edex Kings 8, Gżira United SC, Għaxaq Wolves 6, Buġibba Club de Swat, Fgura Spartans 5, Ħamrun Amateurs 0
