Twitter ħabbret li se tkun qiegħda tgħarraf lill-ħaddiema dwar jekk humiex se jkunu qegħdin iżommu posthom fil-kumpanija wara li Elon Musk ħa r-riedni f’idejh.
F’email interna, il-kumpanija tal-midja soċjali qalet li dan it-tnaqqis jista’ jitqies bħala sforz lejn titjib fis-sitwazzjoni tagħha.
Qalet ukoll li l-uffiċini tagħha se jkunu temporanjament magħluqa u li l-aċċess se jkun sospiż.
Il-multi biljunarju se jkun il-Kap Eżekuttiv ta’ Twitter wara li l-ġimgħa li għaddiet xtara l-kumpanija għall-prezz ta’ $44 biljun.
Fl-email intqal li għalkemm il-kumpanija tifhem li din id-deċiżjoni se tkun qiegħda taffettwa numru ta’ individwi li taw kontribuzzjoni siewja fil-passat, iżda li din l-azzjoni sfortunatament hija neċessarja biex il-kumpanija tkompli twitti t-triq ’il quddiem.
Il-ħaddiema li mhumiex se jkunu affettwati minn din l-azzjoni, se jkunu qegħdin jiġu notifikati permezz ta’ email oħra mill-kumpanija. Min-naħa l-oħra dawk affettwati se jkunu qegħdin jiġu notfikati bil-proċedura neċessarja fil-kontijiet personali tagħhom.
Skont spekulazzjonijiet fil-midja jidher li hemm mal-4,000 persuna f’riskju li jitilfu xogħolhom. Dan hekk kif jidher li l-kumpanija qiegħda tbati biex tagħmel profitt u jidher li tnaqqis fl-ispiża tal-pagi se tkun waħda mis-soluzzjonijiet biex is-sitwazzjoni tinbidel.
