Ir-rapporti tal-aġenziji tal-klassifikazzjoni tal-kreditu dwar il-pajjiżi, huma klassifikazzjonijiet tal-kreditu indipendenti u għandhom rwol sinifikanti fis-sistema finanzjarja globali. Dawn ir-rapporti jevalwaw l-affidabbiltà finanzjarja ta’ pajjiż, li tirrifletti l-kapaċità tiegħu li jħallas lura d-dejn u jissodisfa l-obbligi finanzjarji.
Dawn ir-rapporti huma essenzjali u importanti għaliex għandhom ukoll impatt dirett fuq l-andament ekonomiku ta’ pajjiż, primarjament minħabba r-raġunijiet segwenti;
- Aċċess għas-Swieq Kapitali Internazzjonali
Klassifikazzjoni tal-kreditu favorevoli tippermetti lill-pajjiżi jissellfu fondi b’rati tal-imgħax aktar baxxi fis-swieq globali.
Dan isaħħaħ il-fiduċja tal-investituri u jagħmilha aktar faċli għall-gvernijiet biex jiffinanzjaw proġetti ta’ żvilupp, infrastruttura, jew defiċits.
- Impatt fuq l-Ispejjeż tas-Self
Il-klassifikazzjonijiet jinfluwenzaw ir-rati tal-imgħax li bihom il-pajjiżi jistgħu joħorġu bonds. Klassifikazzjonijiet ogħla jirriżultaw fi spejjeż ta’ self aktar baxxi, filwaqt li tnaqqis fil-grad iżid l-ispiża tas-self.
- Kunfidenza tal-Investitur
Il-klassifikazzjonijiet tal-kreditu jipprovdu punt ta’ referenza għall-investituri istituzzjonali u privati biex jivvalutaw ir-riskji assoċjati mal-investiment fil-bonds ta’ pajjiż. Il-klassifikazzjonijiet iservu bħala sinjal lis-suq finanzjarju dwar l-istabbiltà tal-ambjent ekonomiku u politiku ta’ pajjiż. Dan jagħti mhux biss stabbilità ekonomika imma wkoll politika, għax waħda ma tistax teżisti mingħajr l-oħra.
- Influwenza fuq il-Politika Ekonomika
Il-gvernijiet spiss iqisu l-klassifikazzjonijiet tal-kreditu meta jfasslu l-politiki fiskali u monetarji tagħhom. Meta l-aġenziji tal-kreditu jagħtu jew juru prospetti negattivi, dan jista’ jwassal għal aġġustamenti tal-politika biex itejbu l-istabbiltà finanzjarja u jindirizzaw l-iżbilanċi fiskali. Il-Kummissjoni Ewropea, qed issir dejjem aktar ristrinġenti ma’ dawk il-pajjiżi membri li ma jagħtux każ dawn is-sinjali. Dan għaliex tali attitudni tista’ titfa’ u toħloq problemi għall-blokk Ewropew.
- Stabbilità fis-saħħa tal-munita
Il-klassifikazzjonijiet tal-kreditu indipendenti jaffettwaw il-perċezzjonijiet tal-investituri dwar ir-riskju tal-munita ta’ dak il-pajjiż. Fil-każ tal-Unjoni Ewropea, dan ma japplikax daqstant għaliex kull membru stat iħaddem il-munita tal-ewro. Imma f’ċirkostanzi ta’ prospetti negattivi, jista’ jwassal deprezzament tal-munita nazzjonali, b’impatt fuq il-kummerċ u l-inflazzjoni. U huwa propju għalehkk li l-Kummissjoni tesiġi anki rigward id-defiċit tal-pajjiżi membri fi ħdanha.
- Effetti fuq Ratings tas-Settur Privat
Il-klassifikazzjoni indipendnet ħafna drabi taġixxi bħala limitu għan-negozji domestiċi u l-istituzzjonijiet finanzjarji. Prospetti jew xejra negattiva fil-klassifikazzjoni jista’ jwassal għal tnaqqis fil-grad għall-kumpaniji fil-pajjiż, li jaffettwa l-kapaċità tagħhom li jiġbru l-kapital.
- Sinjali lill-Istituzzjonijiet Multilaterali
Il-klassifikazzjonijiet jinfluwenzaw deċiżjonijiet minn istituzzjonijiet multilaterali bħall-IMF jew il-Bank Dinji dwar pakketti ta’ għajnuna jew termini ta’ self. Din rajnieha fl-aħħar snin wara s-sitwazzjoni li sabet ruħha fiha l-Greċja ftit tas-snin ilu.
Kritika u Limitazzjonijiet
Minkejja l-importanza tagħhom, l-aġenziji tal-klassifikazzjoni tal-kreditu ffaċċjaw kritika. F’pajjiżna stess, fil-passat riċenti kien hemm min allega li xi Gvern jista’ jħallas lil xi aġenzija minn dawn biex tippubblika prospetti pożittivi favur pajjiż jew ieħor anki jekk ma jkunx il-każ. Ovvjament, allegazzjonijiet infondati għall-aħħar għaliex ir-reputazzjoni ta’ dawn l-aġenziji hija kruċjali għall-eżistenza tagħhom.
Malta
Malta issa ilha snin konsekuttivi tirċievi rapporti pożittivi ħafna, inkluż fl-aħħar jiem. Rapporti li jikkonfermaw l-andament ekonomiku b’saħħtu, li jiżboq it-tkabbir medju tal-Unjoni Ewropea. Naturalment, dan ma jiġix waħdu. Dan jiġi għaliex ikun hemm viżjoni ekonomika robusta li tista’ titwettaq, bl-effetti pożittivi kollha li ġġib magħha.
Minkejja l-isfidi interni u esterni li pajjiżna kellu jiffaċċja fl-aħħar snin, għax kellu bażi ekonomika b’saħħitha, stajna bqajna għaddejjin b’ritmu ekonomiku tajjeb, anki fi żmien il-pandemija, fejn konna wieħed mill-ewwel pajjiżi li ħareġ reżiljenti u b’saħħtu meta l-affarijiet reġgħu lura għan-normal.
F’pajjiżna, il-fiduċja tan-nies fl-ekonomija tal-pajjiż, wasslet għal konsum lokali b’saħħtu li qed iħalli impatt pożittiv ferm fuq l-andament tal-ekonomija tagħna. Dawn ir-rapporti jgħinu wkoll f’dan ir-rigward għaliex il-klima ekonomika flimkien ma’ dak imsejjaħ ‘feel good factor’ jippermetti l-familji ma joqogħdux lura milli jixtru u jinvestu dak li jixtiequ jew għandhom bżonn.
Huwa għalehkk kruċjali għal kull pajjiż li jkollu stabbilità politika għaliex din iġġib magħha stabbilità ekonomika u viċi versa. Mingħajr waħda minnhom, ir-riżultati miksuba minn pajjiżna ma jkunux possibbli.
