Fi Brussell, waqt il-Kunsill tal-Ministri tal-Unjoni Ewropea responsabbli mill-oqsma tal-Edukazzjoni, Żgħażagħ, Kultura u Sport, taħt il-Presidenza Daniża tal-Unjoni Ewropea, li ffukat fuq l-użu tal-Intelliġenza Artifiċjali (IA) fil-qasam kulturali, il-Ministru għall-Kultura, l-Arti u l-Gvern Lokali Owen Bonnici enfasizza l-ħtieġa li l-IA tintuża b’mod responsabbli biex issaħħaħ is-settur kulturali, tinċentiva l-innovazzjoni fl-industriji kreattivi u fl-istess waqt tintuża b’mod etiku fl-aħjar sostenn tal-kreattivi nfushom u s-soċjetà inġenerali.
Il-Ministru Bonnici qal li hu ċar li l-iżvilupp tal-IA ġġib magħha benefiċċji kbar, però wkoll tista’ tqanqal tħassib fis-setturi kreattivi jekk ma tkunx użata b’mod tajjeb, etiku u regolat. Dr Bonnici saħaq li hu kruċjali li f’dan kollu jinżamm l-ewwel nett u fuq kollox il-bżonn li l-IA għandha tintuża biex timmassimizza l-potenzjal tal-artist u mhux tissostitwixxih.
Għalhekk, sostna l-Ministru Bonnici, għandu jkun hemm qafas strutturat, fuq livell ta’ Unjoni Ewropea, sabiex ikun hemm koordinazzjoni, u implimentazzjoni aħjar tal-użu tal-IA fil-qasam kulturali. Dan jassigura level playing field fl-istati membri kollha tal-UE, u jagħti serħan il-moħħ lill-kreattivi nfushom u lis-soċjetà kollha kemm hi fl-użu etiku tal-IA. Kruċjali f’dan kollu, sostna l-Ministru Bonnici li fit-tħaddim ta’ dan il-qafas regolatorju fuq livell Ewropew, nersqu kemm jista’ jkun lejn bilanċ adekwat sabiex din ir-regolamentazzjoni bżonnjuża ma tispiċċax toħnoq l-innovazzjoni f’dawn is-setturi kreattivi.
Fl-istess nifs ukoll il-professjonisti kollha fl-oqsma tal-arti, u l-kultura, għandhom jitħarrġu fl-għodod tal-IA jekk verament nemmnu li din għandha potenzjal b’saħħtu immens li tkun għodda siewja biex kull artisti, u kreattiv, jilħaq il-potenzjal tiegħu, u tagħha.
Qal li din id-diskussjoni ma jkollhiex relevanza jekk ma nżommux f’moħħna l-bżonn kbir li naraw li l-kultura għandha tkun kuljum, u għal kulħadd, biex is-soċjetà sħiħa tintlaħaq mis-settur kreattiv u tkun parteċipi fiha.
Matul il-Kunsill saret ukoll diskussjoni dwar il-protezzjoni tal-Wirt Kulturali f’Gaża. Dr Bonnici qal li l-kultura tikkonstitwixxi pilastru essenzjali tal-paċi u tal-ftehim bejn fil-ġnus u għalhekk hu kruċjali li ninkoraġġixxu djalogu kostruttiv għall-ġejjieni. “Malta dejjem lesta tagħti l-kontribut tagħha għal dawn l-isforzi u lesta tappoġġja kull inizzjattiva biex niżguraw li l-wirt kulturali jiġi mħares għall-ġenerazzjonijiet tal-lum u t’għada,” qal il-Ministru Bonnici.
Il-Ministru Bonnici intervjena wkoll f’dibattitu dwar l-hekk imsejjaħ “Kumpass Kulturali” mmexxi ‘l quddiem b’suċċess mill-Kummissarju Malti Glen Micallef. Huwa faħħar dan l-istrument għaliex jirrappreżenta pass sinifikanti favur l-iżvilupp kulturali. Dr Bonnici sostna li fih innifsu dan il-Kumpass Kulturali hu ċelebrazzjoni tal-wirt kulturali u l-protezzjoni tiegħu u se jipprovdi liż-żgħażagħ u l-komunitajiet tagħna b’bażi soda għal aċċess iktar wiesa’ għall-kultura.
